BFP – 7 director usa na ka terorista?
Wa ko magdahom nga tinuod ang balita nga akong nasagap nga paputlan ni Bureau of Fire Protection in Central Visayas kon BFP-7 Director Ma. Luisa Hadjula sa linya sa tubig ug koryente ang mga pasyente sa CCMC nga anaa gipahimutang karon diha sa ground floor sa BFP-7.
Puwerteng tinuora gyud diay kay misuwat siya niadtong Biyernes kang Dr. Gloria Duterte, chief of hospital sa CCMC.
Basi sa iyang strongly worded nga suwat: “This refers to the electrical meter that has just been recently shared by the Office of the Bureau of Fire Protection Region 7 and the Cebu City Medical Center after the 7.2 magnitude earthquake had devastated your building.
“Please be informed that all the water and the electricity that may be consumed by the hospital will be charged to the Bureau of Fire Protection being the registered consumer thereof.
“In this regard, being a partner in public service we would like to advise your good office to provide your own separate meters on electricity and water as soon as possible in order not to hamper your operation because we will disconnect the same any time of the day.”
Nagpadala sab si Director Hadjula ug suwat kang Mr. Bailey Castillo manager, customer and retail sa Visayas Electric Company kon Veco ug nanghangyo siya nga ipabuwag ilang electrical connections/electrical meter sa CCMC.
Bisan anaa akong simpatiya nila ni Hadjula nga gibawian ni Cebu City Mayor Michael Rama sa ilang lote nga giokupahan apan wa sab ko malipay niining iyang pagpaputol sa linya sa korente ug tubig nga kasamtangang gigamit karon sa CCMC.
Kining mga lakang nga ingon ani, trabaho sa mga terorista, iresponsable ug yabag nga klaseng opisyal.
Nganong mo-resort man niining mga klaseha nga puwede man kining istoryahon ilabina nga anaa pa kita sa state of calamity?
Basig nalimot si Hadjula nga ang BFP maoy unang motubang sa mga panginahanglan sa biktima sa kalamidad. Asa man ang iyang giingon nga “partner in public service”?
Kining tonada ni Hadjula maoy tono sa mga suplada ug arogante.
Again in fairness ngadto sa mga kadagkoan sa BFP, kanang ilang giokupahan karon diha sa Cebu City Fire Central sa N. Bacalso Avenue maoy strategic location nga pang-bombero gyud kay gawas sa lapad nga dalan sentro kaayo sa Cebu City north ug south.
Maglaum ko nga may palabra de honor si Mayor Rama sa iyang giistorya kanako nga posibleng ibalik ra gihapon niya ang BFP diha sa N. Bacalso.
* * *
Unsa kaseryoso ang mga kadagkoan sa Commission On Elections (Comelec) ug kapolisan pagdakop niining mga kandidato nga malapason sa lagda sa piniliay sa barangay karong adlawa?
Makaya ba ang pagsikop niadtong mga kandidato ug sa mga kaalyado nga mamalit og boto, mopakaon, mopainom ug mohubog sa mga botante ug ubang matang sa pagsuborno?
May igo bang puwersa ang mga tinugyanan pag-aresto niadtong mangampanya gihapon karon apil na ang pagpang-apod-apod og mga sample ballots ug ubang campaign materials nga gidili na sukad kagahapon?
Sila si Comelec Commissioner Grace Padaca, Comelec Central Visayas Director Temmie Lambino, Provincial Election Supervisor Lionel Marco Castillano uban sa mga hepe sa kapolisan, nanawagan sa publiko atol sa among programang “Dialogue on the Air” sa dySS Super Radyo niadtong Sabado nga tabangan sila pag-monitor sa mga malapason nga kandidato.
Si Commissioner Padaca misugyot nga kuhaan gyud og picture o video pinaagi sa cellular phone aron pagsiguro nga dunay ebidensiya ang ilang opisina aron sayon ra ang pagkonbikto.
Gikinahanglan ang video o picture nga dunay establishing shots nga buot ipasabot iestablisar gyud sa video kun asa nga lugar apil na ang dagway sa kandidato ug mga gihuptan nga ebidensiya.
* * *
Gubot pas lukot ang kahimtang karon sa atong mga huwes, mga court personnel, mga piskal ug ubang occupants nga nagtulda-tulda lang sa gawas sa Palace of Justice human niadtong kusog nga linog.
Ugma nga adlawng Martes human sa eleksiyon nagtinguha ang mga huwes nga magsugod na unta ug hearing sa mga kaso.
Apan lisud pa nga madayon tungod kay way maokupahan.
Akong nahibaw-an gikan kang Metropolitan Trial Court in Cities Executive Judge Francisco Seville niadtong Biyernes nga di gyud mahitabo nga magpundok ang tanang mga opisina.
Matud niya nga silang walo ka mga sala sa MTCC ug walo ka mga sala sa Regional Trial Court (RTC) adto ipahimutang sa building sa Cebu Eastern College diha sa may dan Jakosalem.
Ang ubang RTC courts adto sa Talisay. Samtang ang ubang RTC adto sa Senior Citizens Office sa South Road Properties samtang ang uban adto sa Central Command.
Sama sa akong giingon nga gubot pa gyud sa lukot ang sitwasyon.
Alang nako, mas maayo man tingali nga anha na lang sila tanan sa Capitol premises nga magtulda-tulda lang unya hatagan og container van ang matag sala aron butangan sa mga papeles ug mga butang.
Unya ako sang nabantayan nga sagad sa mga huwes uyon ra man nga anha ra sa Capitol grounds kay gawas nga luwas sila sa security, duna pay mga facilities sama sa comfort rooms ug parking area unya dili sab kaayo gasto sa mga court personnel ug sa mga abogado ug litigante.
Sigurado ko nga kun ibuwag sa upat ka mga lugar ang RTC momahal na ang atong mga abogado kay lagyo na man ang mga korte ug katag kaayo.
* * *
Happy anniversary diay sa akong pinanggang kapikas karong adlawa nga si Mommy Myrna.
Pagkadali ra gyud sa panahon. Wa lang damha nga mag-13 na kami ka tuig sa among kaminyoon.
Salamat sa akong duha ka mga anak nga sila Karl ug Karen nga maoy maghatag og dugang kolor paglig-on sa among relasyon isip mga magtiayon ug mga ginikanan.
