Motabang gyud ta sa bag-ong CCMC
Oras na nga magtinabangay kita pagpatukod sa daling panahon ug bag-ong Cebu City Medical Center kon CCMC.
Ang sunod-sunod nga aftershocks niadtong Domingo nga miresulta sa pagdagko ug samot sa mga cracks karon sa Cebu City Palace of Justice maoy nakapa-usab sa akong baruganan nga kinahanglang gub-on dayon ang 52 year old nga CCMC.
Dili nalang ko mangisog ug mangahas pagsulod sa CCMC kay dihang akong gibalikan pagkat-kat ang 4th floor sa Palace of Justice niadtong Lunes sa hapon namarog akong mga balhibo dihang akong na-obserbahan nga misamot kadagku ang kang-a sa mga liki sa building.
Sama sa akong giingon sa akong radio program nga risgo man gani alang sa mga okopante sa building sa korte nga lig-on tan-awn ug mas bag-o unsa na kaha ang building sa CCMC nga karaan na kaayo?
Kagahapon sa mga alas 11:00 pasado, si City Hall Public Information Officer Carlo Dugaduga mipahibawo nga mi-abot na ug 5.7 million ang nahipos nga donasyon pagpatukod ug bag-ong CCMC.
Sa breakdown, P5 million gikan kang Hans Sy sa SM Prime Holding; P500,000.00 gikan kang Davao City Mayor Rodrigo Duterte; P100,000.00 kang Senator Peter Allan Cayetano; P50,000.00 kang former City Councilor Manuel Legaspi ug laing P50,000.00 plus gikan sa lain-laing mga tawo sa gipasi-ugdahan nga “piso-piso fund drive”.
Ang ako lang sab niining gipahigayon nga “Piso ko, Hospital ko” fund drive diha sa kadalanan, kinahanglang way pugsanay sa pagpangayo ug manghinaut ko nga dili kini sakyan sa mga tawng surambaw.
Kadtong andam motabang pwedeng mohagbong sa mga garapon ug pwede sab nga modirekta pagtunol sa Cebu City Hall o ba kaha mo-deposito sa bangko sa BDO account no. 002680079333 nga ang account name ‘City of Cebu Trust Fund’.
Maglaum ko nga molampos si Mayor Michel Rama sa iyang tinguha nga maka-kuha ug tabang gikan sa Japan International Cooperation Agency (JICA) ug ni Japan Consul Yoshiaki Hata aron maka-abot kita sa P1.5 billion target pagpatukod ug mas daku ug lapad nga government hospital nga maka-accommodate ug 1,000 bed gikan sa 300 bed facility.
* * *
Sama sa akong giingon sa unahan nga risgo gyud kaayo ang 4th floor sa Palace of Justice kay pwerte sab gyu’ng gubaa unya dagko sab kaayo ang mga liki sa 3rd floor paingon sa 2nd floor ug sa ground floor.
Sila si Building Administrator Isagani Saranillo ug iyang assistant nga si Henry Espinoza miingon nga ang magamit pagkakaron mao ang ground floor unya didto sa 2nd floor mao ang RTC Branches 7, 8, 9 ug 10.
Apan ang mga kawani nga mag-okopar sa nahisgutang mga sala dili gyud mosugot nga manarbaho tungod kay mahadlok nga mahugno ang building.
Akong tinubdan miingon nga kung gub-on ang entire building molanat pa ug mga 5 ka tuig una makabarog ug balik ang Palace of Justice.
Daghang option karon si Judge Peras aron maka-resume ug bista sa mga kaso.
Usa sa ilang gihuna-hunaan mao ang pag-abang ug dakung building o ba kaha adto sa Central Command o ba kaha pag-mobilize sa Justice On Wheels sa Korte Suprema.
Matud niya nga posibleng manghuwam usab sila ug mga aircon buses sa Cebu City Hall ug sa Kapitolyo aron i-convert ug court room.
Ang plano nga adto sa CENTCOM, akong nahibaw-an nga magpa-construct sila ug mga temporary court rooms nga gama lang sa plywood.
Hinoon gitun-an kining tanan kung unsa gyu’y maayo.
* * *
Kung way ill-motive ug kung way kasupakan sa lagda akong suportahan ang resulosyon sa senado nga ipa-convert ni Presidente Noynoy Aquino ngadto sa calamity fund ang P4.8 billion nga savings nga wa magamit sa mga magbabalaud gikan sa ilang PDAF o pork barrel 2013.
Kini aron matabangan sa hingpit ang mga biktima sa linog.
Si Senate President Franklin Drilon nga maoy author sa resolusyon nagpasabot nga dili kasupakan sa gipagawas nga temporary restraining order (TRO) sa Korte Suprema tungod kay ang konstitusyon naghatag ug gahom sa executive department pag-realign sa kwarta nga gikan sa savings.
Aron dili ma-contempt ang Executive Branch kinahanglang hatagan ug bahin ang korte dinhi sa Sugbo ug ang pagpatukod ug bag-ong CCMC.
