Unsay mensahe sa Ginoo human sa linog?
Halos tanan, nalisang gahapon sa buntag sa 7.2 magnitude nga linog kay kusog gyud kaayo. Ang epicenter atoa sa Carmen, Bohol nga anaa diha nahimutang ang sikat nga “Chocolate Hills”.
Paeta gyud kay nabatyagan gihapon namo ang daghang aftershocks. Gani sa wa pa mag-alas-5 kagahapon sa hapon dunay tulo ka mga kusog nga aftershocks.
Nabalaka gyud intawn kami nga dunay aftershock kay biktima sab mi sa linog kagahapon apan swerte lang kay way naigo kanamo sa nangatagak nga debris sa nahugno nga wall sa balay.
Ang bahin sa bongbong nga konkreto nga nagporma og triangle nga maoy gitungtungan sa atop maoy nahugno ug bana-bana sa among panday nga mga 20 kapin ka hollow blocks ang itapak aron paglig-on og balik.
Sukad sa akong kabatan-on, kadto maoy labing kusog nga linog nga akong natagamtaman. Unya ang nakapait pa gyud kay nangatulog pa mi niadtong higayona kay way klase gahapon uban sa akong kapikas ug mga anak.
Akoy unang nakamata namong upat ug akong gipa-kalma ang tanan. Dihang naglumba na og hilak akong mga sakop sa bay, paspas nakong gibunlot ang imahen ni Señor Santo Nino ug nangaliya intawn Kaniya nga dili palabihan.
Grabe gyud kakusog ang linog ug ambot kun unsay mensahe sa Kahitas-an kay halos tanang Simbahan pulos gyud dunay danyos.
Pinaka-dakong danyos ang sa Basilica Minore del Santo Niño kay nahulpa gyud ang kampanaryo.
Apan swerte lang kay way klase kay kung naatol pa, delikado gyud kaayo ang mga batang estudyante nga adto magduwaan sa natugpahan sa kampana ug mga debris kay dunay gamay nga fishpond diha nga kalingawan sa mga bata.
Makapanlimbawt sab sa balhibo ang danyos sa Adoration Chapel sa Cebu Metropolitan Cathedral kay ang nahulog nga coral stone gikan sa ibabaw sa simbahan mibuslot sa atop sa chapel ug miigo sa “monstrance” o sudlanan sa Ginoo ug mipuli ang bato sa nahimutangan sa ampo-anan.
Gawas sa adoration chapel, ang atubangan sab sa Cebu Cathedral ug sa bell tower daghang bricks ang nangatagak ug girekomendar na ni Engineer Ricky Dakay nga panahon na nga ilisan ang mga construction materials nga gamiton.
Nasuroy sab nako gahapon ang Pasil Fish Market nga dunay lima ka namatay on the spot human nalusno-an sa beam sa building.
Grabe sab ang nahitabo sa GMC Plaza building atbang sa Plaza Independencia kay nahunlak sab ang tibuok 3rd floor unya ang debris nakapiyapi sa duha ka mga luhong sakyanan.
Halos tanang mga building sa downtown area nanira kagahapon ug sa pinaka-latest nga report 20 na ang patay ug 180 kapin ang nanga-angol.
Mag-ampo lang ta!
* * *
Dili ba “BISDAK” o “Bisayang Dako” si “Arlene” nga kawani sa korte nga na-amiga ug konektado kang Janet Lim-Napoles kinsa giingong dako kaayo og impluwensya sa judiciary?
Basig mao ni ang tigdala ug lechon, danggit ug mangga aron isuburno sa mga justices?
Nahinumdum man gud ko pag-surrender ni Napoles sa Malacañang nga mipaila siya kang Secretary Rene Almendras nga usa siya ka dakong Bisaya.
Kung Bisaya si Napoles, basig si “Arlene” bisaya pud kay mas kampante man gud ang taw nga iyang sud-on ang susama niya og linggwahe ug kultura.
Pagka-daghan ra bang “Arlene”. Sa akong nahibaw-an dunay “Arlene” nga lalaki apan mas daghan sa babaye.
Sa nahibaw-an si “Arlene” pinaagi kang Napoles mitabang sa eleksyon sa pagka-presidente sa Philippine Judges Association kon PJA
Gumikan ni “Arlene” kinsa posibleng napiksan og dakong kwarta ni Napoles sa P-10 billion pork barrel fund scam, gitun-an na karon nga ipa-ubos sa “lifestyle check” ang mga huwes ug mga court personnel.
Ang Korte Suprema, Ombudsman, Department of Justice ug National Bureau of Investigation mihimo sila karon ug managlahing imbestigasyon kang “Arlene.”
Kinsa man gyud ni si “Arlene”? Nganong di man maka-trace-up ang Korte Suprema nga ila man kining sakop? Wa kaha ni tabon-taboni sa mga kadagkoan sa SC?
Si “Arlene” ra kaha ug ang presidente sa PJA ang nabulahan ni Napoles?
Way mahistrado sa Supreme Court ug sa Court of Appeals ang napiksan ni “Arlene” ug Napoles?
* * *
Unsa man gyud ka seryoso ang Cebu city government pinangulohan ni Mayor Michael Rama paghipos niining mga Badjao nga manglimos sa kadalanan, mga dispatchers ug mga mobantay sa mga sakyanan nga mangayo’g kwarta?
With all due respect, akong naobserbahan nga mokisaw lang ang Syudad pinaagi sa Anti-Mendicancy Task Force kun duol na ang Pasko.
Way mga pulis ug mga City Traffic Operations Management personnel nga konsabo ning matang sa sindikato? Makapaduda man gud kay nagbalik-balik ning maong problema.
Kung may “political will” si Mayor Rama, kaya kaayo nga mahipos ning mga tawhana.
Si Dr. Rene Obra nga sakop sa task force miangkon nga maglisud gyud sila sa pagpanghipos tungod kay way building nga kabutangan sa mga makit-an sa kadalanan kay way budget ang gobyerno ilabina sa pagpaka-on. Maoy rason nga ilang buhian.
Si manlalaban June Maratas sa Cebu City Legal Office miingon nga ilang sampolan ang pagkiha batok niining mga manglimos ilabina nga hamtong na ang edad.
Pero ambot lang gyud kung makaya ba sa konsensiya nila nga ang manglimos mga buta, tiguwang, ug mga taw nga wa gyuy mahimo sa pagpakabuhi.
Ang usa sa mga magtutudlo nga Badjao nga si Sanida Musa nga mitambong sa among programang “Dialogue on the Air” mipadayag nga kung napunta pa lang ang P10 billion sa pork barrel fund scam ngadto kanila, wa nay Badjao nga manglimos aron mabuhi.
Midugang si Musa nga pait gyud kaayo ang sitwasyon sa ilang mga kaubang Badjao kay bisag mamaligya ug mga borloloy diha sa may Magellan’s Cross badlungon gihapon sila.
Mihangyo siya sa mga kadagkoan sa City Hall nga hatagan sila og libre nga pwesto ug patrabahoon ang uban kanila bisag tiglimpyo nalang sa comfort rooms aron dili manglimos sa kadalanan.
Pasudlag trabaho sa City Hall ang mga Badjao, Mayor Mike!
