Duha ka mga huwes target sa tinunto
Nasurprisa kaayo ko niadtong Biyernes sa hapon dihang dunay patrol car nga nagwang-wang nga mikalit og abot sa luyo nga bahin sa Palace of Justice.
Ang akong mga news sources mitug-an nga ang hinungdan mao diay nga nakadawat og death threat si Rregional Trial Court Judge Enriqueta Belarmino.
Wa maglangay akong nakit-an nga migawas si Judge Belarmino sa building sa Palace of Justice ug dunay mga pulis nga mi-escort kaniya.
Dihang misampit ko ni Judge Ekit wa na kini motimbaya ug akong naobserbahan nga wa gyud makasabot sa iyang kahimtang.
Unsa man gyud kaseryoso ang hulga nga nadawat sa huwes ug kinsa may responsable?
Unsa man, gipaagi kini sa text message or gipaagi sa tawag sa telepono?
Hinuon in fairness sa huwes siya maoy labing nasayod sa gibug-aton sa pagpanghulga nga iyang nadawat.
Posible ba nga sumpay kini sa paghupot niya og mga kaso nga naglambigit sa mga illegal nga drugas o personal?
Naluoy ko ni Judge Belarmino kay usa intawon kini ka babaye unya bag-o lang namatay iyang bana nga si court sheriff Jessie Belarmino.
Si Judge Belarmino usa sa mga ligdong nga huwes dinhi sa dakbayan sa Sugbo nga alang nako kinahanglang protektahan 24/7 sa atong mga tinugyanan samtang di pa uwahi ang tanan.
* * *
Di lang si Judge Belarmino ang naproblema karong mga panahuna. Si Judge Ma. Lynna Adviento nasugamak usab og laing isyu dihang nagamit iyang pangan sa peke nga “hold departure order” batok sa dakung opisyal sa usa ka imnonon nga produkto.
Ang nakaporke ra ba kay ang taga-Bureau of Immigration and Deportation (BID) misakay dayon sa mini nga dokumento ug giapil gyud ang pangan sa dakung opisyal sa listahan sa BID nga dili makagawas sa Pilipinas.
In fairness ni Judge Adviento puwerteng lahia ra gyud sa iyang pirma kay sa signature nga nahipatik.
Ang huwes mipagawas na og certification nga nagmatuod nga wa siyay gipagawas nga “hold departure order” batok kang Alberto Dy Sun y Ramallosa also known as Albert R. Dy Sun nga taga-Quezon City, presidente sa Yakult Philippines.
Sa certification giklaro usab sa huwes nga way pending nga criminal case si Sun sa iyang sala nga kasong illegal recruitment and estafa.
Haskang paita gyud sa taga-BID nga tira pasagad lang sa trabaho. Ingon ani diay kainutil ang taga-BID nga moderetso og isyu nga dili subayon ang authenticity?
Si manlalaban Jemma Carreon, clerk of court ni Judge Adviento mipasabot nga ang case number sa peke nga dokumento batok ni Sun dili dinhi sa dakbayan sa Sugbo kun dili didto kini sa Manila.
Pagkadaghan na gyud sa mga alisto karon! Kaniadto duna say mga kawani sa korte nga maoy mihimo sa mga peke nga desisyon pagpaanular sa kaminyoon.
* * *
Alang nako, mas maayo nga mo-intervene ang management sa University of San Carlos (USC) niining kaso diha sa sala ni Judge Simeon Dumdum ug i-manifest sa korte nga di lang paduwaon si Scott Aying sa nahibiling higayon niining liga sa basketball sa Cebu School Athletic Foundation Inc kon Cesafi-Junior Division nga nakuwestiyon ang iyang legitimacy nga makaduwa.
Dako og papel ang USC nga masulbad kining maong kasungian ngan nga law abiding sila ug katungdanan sa tanang participating school nga protektahan ang ilang liga.
Akong klarohon nga daghan pang torneyo sa Cesafi ug segurado ko nga mosikat pa si Scott sa natad sa basketball.
Nakasabot gyud ko sa punto sa mga opisyales sa Cesafi nga di gyud paduwaon si Aying hangtud dili kini makaabot sa two-year residency sa USC.
Naluoy lang ko ni Judge Simeon Dumdum nga gihan-ukan ning maong problema nga unta daghan pang dagkung kaso nga angayng atimanon.
* * *
Hisgot naman gyud ta og basketball, wa nako malipay sa akong nadawat nga mga istorya nga nanghulga na karon si coach Mark Tallo ngadto kang Sir Jefferson Go, executive board sa Cebu Eastern College non CEC human gitangtang pagka-coach sa CEC.
Dunay rason ang management sa CEC pagtangtang ni coach Tallo tungod sa iyang behavior nga mopasakit sa iyang mga player nga mga minor de edad.
Gani ang mga ginikanan sa mga players sa CEC nagtinguha na karon nga mokiha kang Tallo kay duna pa siyay mga binuhatan nga makalisang kaayo sa mga bata.
Akong sublion nga way luna ang coach sa usa ka learning institution nga mopasipala sa mga tinun-an nga maoy bugtong bahandi sa mga ginikanan.
* * *
Dili mahulagway ang hilabihang kalipay sa among pinanggang inahan nga si mama Ernesta nga among gisurprisa pag-adto sa akong yutang natawhan sa Casay, Dalaguete kagahapon sa kadlawon kinsa nagsaulog sa iyang ika-79 nga adlawng natawhan.
Wa nako isapayan ang kakapoy sa lawas gikan sa culmination activity sa 19th Cebu Press Freedom celebration ug mibiya pa kami uban sa akong daghang mga igsoon ug mga pag-umangkon pagbiyahe paingon sa Dalaguete.
Bilib ko sa akong inahan nga naningkamot intawon nga makaabot sa edad nga 80 anyos ug nanawagan siya kanamo nga iampo siya nga makaabot gyud.
Apan dihang ako siyang giingnan nga kinahanglang abton niya ang 100 years, dali siyang mitubag nga kapoy na.
Hinuon anaa ra ang tanan sa atong Labawng Makagagahum. Matuman ang iyang pagbuot.
