Inside job ang pagpatay ni Jessie Tabanao?
Samtang nagsuwat ko ning akong lindog niadtong Sabado sa gabii, nakadawat ko og mga text messages nga dunay biktima sa pusil diha sa may dalan Escario ning dakbayan sakop sa barangay Camputhaw.
Sa sinugdanan wa ko manumbaling sa alarma kay akong gituhoan nga ordinary lang ang krimen o away sa mga hubog.
Apan mga pasado ala-1 sa sayong kadlawon sa Domingo na, duna nay mi-text kanako nga ang biktima diay mao among kanhi kauban sa broadcast media nga si Bombo Jessie Tabanao nga tigpamaba karon sa Philippine Drug Enforcement Agency (PDEA) in Central Visayas.
Akong nahibaw-an nga sa wa pa ang krimen, gikan si Jessie sa ilang buhatan sa PDEA kay nanguha sa iyang mga butang kay nakadawat kini og direktiba nga adto siya ibalhin sa Butuan.
Unya gikan sa PDEA buot unta niyang kuhaon iyang asawa apan pag-abot diha sa may Escario unahan sa Golden Peak Hotel giingong dunay nagsunod kaniya nga nag-motor ug didto gipusil.
Akong nahibaw-an kaniadto nga dunay factionalism nga nahitabo sulod sa PDEA.
Pero in fairness nila basig nahilot na to.
Apan kinahanglang subayon sa kapolisan ang ubang anggulo sa pagpatay ni Bombo Jessie kay posibleng may kalambigitan kini sa iyang aktibo nga pag-apil-apil sa kampanya sa illegal drug operations kay daghang mga speculation nga nanggawas kay nagmaneho kini sa bag-ong luhong sakyanan ug dunay mga 50 mil pesos nga nakuha sa iyang possession.
Ang patayng lawas ni Jessie anaa gihaya diha sa Saint Peter Imus Branch.
Ngan nga si Jessie among kanhi kauban, gikasubo sab namo kini karon samtang nagmalampuson kami kagahapon sa buntag sa pagbukas sa 19th Cebu Press Freedom Week celebration.
* * *
READ: Sulbad naba gyud ang kaso ni Jessie Tabanao?
Konbinsido ko nga namakak si Presidente Noynoy Aquino nga moinsister nga wa siya makaila personal ni Janet Lim-Napoles.
Adunay panultihon sa iningles nga “The picture will speak for itself”.
Sa mga kuha sa pictures nilang P-Noy ug sa mga Napoleses akong nasabtan nga dugay na silang kaila.
Kun di pa kaila sa Presidente, si Napoles dili kaha babagan sa mga sakop sa PSG kon Presidential Security Group aron dili makaduol sa Presidente?
Akong klarohon nga isip tig-cover sa mga presidential visits, wa pa gyud na maputol ang batasan sa taga PSG nga hilabihang estriktoha pag-secure sa kinabuhi sa atong Presidente.
Ang makasayon-sayon og duol sa Presidente kadto rang mga suod kaayo tawon uy.
Sukad pa kini niadtong panahon ni kanhi president Fidel Ramos ug hangtud ning kasamtangang administrasyon, dili gyud malikayan nga magkabingkil pa gani ang PSG ug mga mediamen tungod sa ka estrikto.
Kami nga dili mga terorista ug klaro nga dunay legitimate purpose pag-cover sa Presidente ug bisan gipa-ubos na kami sa higpit nga inspection dili gyud tugtan nga makaduol-duol sa Presidente.
Pero dunay Janet Lim-Napoles mastermind sa P-10 billion pork barrel scam uban sa iyang pamilya nakasayon-sayon pagduol ni Presidente Noynoy pagpahulagway.
Abi ba nako nga sila ra si Senators Franklin Drilon, Bong Revilla Jr, ug Jinggoy Estrada nga nakig-picture-picture ni Napoles.
* * *
Nagpapel man tawon ning grupong Citizens Crime Watch (CCW) nga nag-una-una sa pag-file niadtong Biyernes sa kasong plunder batok nilang Janet Lim Napoles, mga senador ug mga kongresista.
Unsa man kalig-on ang mga ebidensiya nila ni manlalaban Jose Malvar Villegas ug Carlo Batalla sa CCW batok nilang Napoles?
Akong tan-aw niining grupoha igo rang misakay sa isyu.
Wa na lang gyud sila makapaabot karong adlawa nga i-file na ni Department of Justice Secretary Leila De Lima ang kasong plunder batok sa mga kawatan nga nalambigit sa multi-billion peso pork barrel scam nga gipaagi sa peke nga non-governmental organizations kon NGOs ni Napoles.
Ang mga gipangkiha mao sila si Senators Juan Ponce-Enrile, Ramon “Bong” Revilla Jr., Ferdinand “Bongbong” Marcos Jr., Jinggoy Estrada ug Gringo Honasan.
Lakip sa gikiha mao ang 23 ka mga kanhi ug kasamtangang mga kongresista nga mga kauban sa gabinete ni Presidente Aquino nga sila si Customs Commissioner Ruffy Biazon kinsa kanhi kongresista sa Muntinlupa ug Technology Education and Skills Development Authority Director Joel Villanueva nga kanhi representante sa Citizens’ Battle Against Corruption kon Cibac party-list.
* * *
Nabalaka ko sa gitug-an ni National Food Authority kon NFA Provincial Manager Nestor Rey Alcoseba niadtong Sabado sa among programang “Dialogue on the Air” sa dySS Super Radyo nga moabot pa og P870,000 ka sakong bugas humay sa ilang mga bodega.
Nahadlok ko nga mangabaho lang kining maong mga bugasa nga gikan sa Vietnam kay ting-ani na sab niining ika fourth quarter sa tuig taliwa sa pasalig ni Alcoseba nga madispose ra gihapon ang tanan nga way mapunta og himoong feeds sa mga hayopan.
Iyang gipasabot nga ang hinungdan sa pagmahal sa presyo sa commercial rice tungod kay ang third quarter sa tuig minus gyud ang supply.
Posible matud pa, nga dunay nahitabong rice hoarding sa mga stocks sa bugas apan in fairness sa mga negosyante lisod kining pamatud-an.
