Naa pa bay Osmeña nga ma-presidente?
Posible nga makabalik ang mga Osmeña sa Malacañang kay possible nga dunay mapresidente kanila. Apan di pa karon niining ilang generation.
Dako kog respeto sa mga karaang Sugboanon nga moingon nga lahi ra gyud ang mga Osmeña karon itandi kang late President Sergio Osmeña Sr nga maoy gihamdom natong mga Sugbuanon karong adlawa nga maoy hinungdan nga way trabaho ug way klase kay “Osmeña Day” karon.
Wala sa mga Osmeña karon ang pagkamapahiubsanon ug kanang maalagaron sa tinud-anay.
Karon atong makita sa mga Osmeña nga mga tag-as na kaayog garbo unya madumtanon.
* * *
Sulit gyud kaayo ang diskusyon namo niadtong Sabado atol sa among programang “Dialogue on the Air” sa dySS Super Radyo nga nagtuki bahin sa proposal nga wagtangon na ang Sangguniang Kabataan kon SK.
Si Cebu Provincial Election Supervisor Lionel Marco Castillano miingon nga pabor gyud siya nga wagtangon na lang ang SK kay ilang nakita sa Commission on Elections (Comelec) nga gihimong training ground ang SK sa vote buying ug ubang matang sa pagpanikas sa eleksiyon.
Mipasabot si Castillano nga ilang i-reecho ang sentimento ni Comelec Chairman Sixto Brilliantes pag-abolish sa SK kay gawas nga grabe ang palit sa eleksiyon dili sab kaayo maka-function ang SK kay gawngan sa mga politiko unya ang uban mang-eskuwela sa kolehiyo.
Ug tungod sa ilang edad nga menor pa dili makasulod og kontrata alang sa ilang mga proyekto nga ipatuman.
Apan misupalpal ni Castillano sila si John Philip Po II Cebu City SK Federation president ug iyang mga kauban lakip na nila ni manlalaban Aiza Fiel Nogra legal officer sa Department of Interior and Local Government in Central Visayas, manlalaban Pacita Isugan, Dr. Josefino Ronquillo sa Commission on Higher Education Central Visayas ug kang Victor Yntig sa Department of Education.
Ilang gipasabot nga dili sulbad ang pag-abolish sa SK sa mga negatibong isyu niini kun dili mao ang pagreporma.
Ilang gipasabot nga ang reporma apil na ang paglikay kanila nga magawngan sa mga politiko ug ang isyu parte sa grabeng pinalitay sa boto.
Lakip sa ilang sugyot mao nga usbon na ang edad sa SK. Inay 15 hangtud sa17 years old usbon na ngadto sa 18 hangtud sa 21 years old.
Si Po miingon nga wa gyud intawon mahitabo kaniya ang pinalitay sa boto. Gipaagi ang tanan sa limpiyo nga eleksiyon.
Pero ambot lang kun tinuod ba ang iyang gisulti ilabina nga mahinungdanon iyang boto diha sa Konseho.
* * *
Basta basketball nay hisgotan namong mga sakop sa media, sadya ug alegre gyud kaayo unya dali kaayong magkasabot.
Bisan sagad kanamo busy kaayo sa trabaho apan dili isapayan tungod kay nagkaduol na ang Cebu Press Freedom Week nga sugdan karong Domingo pinaagi sa parade nga anha mag-abot sa Fuente Osmeña unya subay sa Mango Avenue unya left turn sa Colegio Dela Imaculada Concepcion unya right turn sa Ayala Business Park ug left turn paingon sa gym sa CCTN-47 aron adto ang Misa ug mga kalingawan sa opening.
Subay sa maong selebrasyon, sama sa naandan kaming mga tigbalita ug mga naglangkub sa NBAC kon Newsmen Basketball Association of Cebu ug sa Cebu Federation of Beat Journalists (CFBJ) inabagan sa mga haligi sa industriya sama ni Ma’am Michelle So nagpasiugda na sab ug Inter-Beat sa duwang basketball.
Niadtong Sabado, petsa 7, milampos kami sa among opening sa basketball ug magpasalamat kaayo kami sa tanan nga misuporta ug mitunga gyud sama ni Sir Bobby Inoferio among NBAC commissioner, Cebu City Vice Mayor Edgardo Labella ug Sir Elias Baquero president sa CFBJ.
Dako sab namong yukbo sa pagpasalamat sa management sa Cebu Easter College kon C.E.C pinangulohan nila ni Sir Jeff Go ug Sammy Sia nga mga Executive Board ug ni Sir John Maraat nga maoy property custodian ug Sports coordinator kay ilang gipagamit ang ilang main gym sa among liga.
Gilangkuban kini ug upat ka teams sa mga beat reporters: 1.) Judiciary-Capitol nga midala sa bansagon nga “Judiciary-Motorgas” 2.) Sports 3.) PNP-AFP beat reporters ug ang 4.) CHARMS kon Cebu City Hall beat reporters.
Unya ang nakanindot nga balita kay kami sa “Judiciary-Motorgas” maoy nag-una sa standing kay among gipalukapa ang City Hall beat niadtong Sabado ug milampos sab mi pagpukan kagahapon sa PNP- AFP beat.
Maninguha mi sa “Judiciary-Motorgas” nga kami na sab ang mokampiyon karong tuiga kay anaa kanamo ang “The Best Magic Five” nga maoy nakapakugang sa grupo nilang Chito Aragon sa PNP nga maoy defending champion.
