Niresulta na ang pagkalaksot nga higala
Akong nahibaw-an kagahapon nga mga kawani ra sab sa korte ang nanawag og mga pulis aron ipadakop si manlalaban Raul Sesbreno kagahapon sa hapon sa opisina ni manlalaban Jeoffrey Aquino sa Central Clerk of Court sa Cebu City Palace of Justice.
Kung tarong pa siguro nga amigo si Sesbreno ug dili hingiha sa taga-korte, daghan pa ang molaban kaniya.
Matud pa sa akong mga tinubdan, na-shock sila nga misulod si Sesbreno sa Palace of Justice bisag dunay pending nga warrant of arrest sa sala ni Regional Trial Court Judge Ester Veloso sa Branch 6 sa kasong Serious Illegal Detention in Relation to RA 7610.
Nahimong kataw-anan kagahapon ang eksena sa pagdakop ni Sesbreno kay nagpalaban intawn siya kang Joaquino nga usa sa iyang gikiha kaniadto.
In fairness, way nahimo si Joaquino kay mga pulis na man ang mibunlot kaniya.
Unya dihang way nahimo si Sesbreno mimando siya sa usa sa iyang bodyguard nga ipakuha iyang dala nga maoy hinungdan nga gipahugtan dayon ang seguridad sa Palace of Justice.
Wa gyud kalighot ang abogado nga hingiha kay dali sab kaayong naabot ang duha ka mga pulis nga sakop sa Special Weapons and Tactics group.
Samtang gidala siya sa sala ni Judge Veloso nga maoy proseso, paspas kaayong nakahuwam og type writer ug iyang gidali-dali pag-type iyang hangyo sa huwes nga ipa-suspenso ang pag-enforce sa warrant of arrest.
Ako pa siyang naabtan nga nag-type nga wa pusasi. Apan ang mga pulis nga nakabantay nga nag-abot-abot kaming mga sakop sa media gipusasan pagbalik si Sesbreno bisag mihangyo nga di lang unta siya pusasan aron makatuplok og tarong sa makinilya.
Pero wa siyay nahimo kay gipusasan gyud sa mga arresting officers. Apan nakatiwas siya pag-type nga way sipyat. Mao nga makaingon ko nga expert gyud kaayo siya sa typing lesson.
Mao nga di na gyud ko matingala ni Sesbreno nga paspas kaayong nakakiha kanamo kaniadto sa Bombo Radyo pa mi kay bisag nabalhog siya sa kasong murder sa Bagong Buhay Rehabilitation Center, nagdala og radio monitor ug matag komentaryo namo kaniadto kaniya, dukdok dayon sa makinilya unya iyang asawa nga si anhing Virginia maoy moadto sa piskaliya paghatud sa mga kasong libel batok kanamo. Hinoon nahurot nag ka-dismiss.
In fairness kang Sesbreno nga among na-interview kagahapon, iyang gipadayag nga biktima siya sa conspiracy sa taga-korte ug sa mga taw nga naglagot kaniya.
Iyang gihulagway nga illegal ug klaro kaayo nga pagpaka-ulaw ug pagpanaugdaug sa iyang pagkataw ang nahitabo kagahapon.
Iyang gipasabot nga kining kasong serious illegal detention kabahin kini sa pasangil nga iyang gibalhog ang tulo ka mga minor de edad nga mga anak sa iyang gipapahawa sa iyang lote diha sa Talisay nga maoy na-ingnan sa pag-ambush patay sa iyang asawa nga si Virginia Sesbreno.
Gipasabot usab ni Sesbreno nga wa gyuy ebidensiya ang kasong serious illegal detention batok kaniya mao nga iyang gitinguha karon ang pagduso og petition for certiorari ug ipa-quash ang information sa kaso ug ipa-deklarar nga null and void ang gi-isyu nga warrant of arrest batok kaniya.
Nag-pagawas usab si Sesbreno ug pamahayag kagahapon sa pagpa-inhibit kang Judge Veloso sa iyang kasong serious illegal detention kay matud pa, wa siyay makuhang kaangayan sanglit may kalagot usab kaniya kay matud pa ang amahan sa huwes iyang nakontra sa kaso sa mao gihapong luna nga iyang maangkon sa hingpit.
Misaad ang abogado nga iyang tiwason ang kawsa pag-angkon sa mga parsela sa yuta nga iyang daug isip attorney’s fees taliwa nga na-ambush patay iyang asawa ug kining nahitabo kaniya karon nga siya gipadakop kay dako siyag pagtoo nga makalingkawas ra siya niiing maong kaso.
Hala kumbate, Nyor!
* * *
Nagmahay intawn ang mga ginikanan sa biktima sa “gang rape” nga mipasangil sab nga gi-lugos siya sa iyang guwardiya sa Department of Justice Witness Protection Program nga si Romelo Pabroa, human mibalibad pagtabang si Vice Gov. Agnes Magpale isip chairperson sa Provincial Women’s Commission kon PWC.
Gipasabot sila ni Magpale nga way jurisdiction ang PWC nga motabang.
Ako nagtuo nga gibase ni Magpale ang iyang pagbalibad pinaagi sa technicality.
Una, tungod kay ang biktima anaa nagpuyo sa dakbayan sa Lapu-Lapu diin ang Lapu-Lapu independente na sa Probinsiya sa Sugbo ug ang ikaduha mao nga ang mga residente sa Lapu-Lapu Mactan dili na makabotar sa mga politiko sa probinsiya.
Buot bang ipasabot, nga isipan na kaayo karon ang taga-Kapitolyo? Asa na man ang tininuod nga kawsa pag-proteher sa tibuok kababayn-an sa probinsiya? Dili na diay Sugbuanon ang taga-Lapu-Lapu? Kun mao ni nganong mosupak man ta nga mohimo sila og ilang kaugalingong probinsiya? Kinsa man ta nga mobabag nila?
Dili kaha mo abot sa punto nga ang asawa ni Pabroa mao nay tabangan sa PWC human ma-konbinse sa bana nga tumo-tumo ra ang tanan?
