Balak
Sulod sa jeepney may babaye nga dughanong gasando og yellow nga naghinayhinay og panangtang sa iyang mga singsing, bracelet, ariyos ug kwentas dayon pakumkom niani ngadto sa iyang kuyog nga lalaki. Dayon gitangtangan usab niyag kwentas ug ariyos ang lalake ug iya sab kining gipakukom og apil. Iya dayong gikuha ang gikumkukom niani ug gisulod niya sa plastic nga botelyang pang vitamins. Iya dayong giputos ang botelya ug bulingong plastic. Ang mga makapakuryoso nga tanghaga sama niani ang makapahimo og balak.
Ning miagi lang nga ting-init duha ko ka higala ang mipagawas og libro sa balak nga Ininglis. Ang usa kanila magtutudlo sa Silliman University nga si Cesar Aquino. Ug ang usa si Regional Trial Court Judge Simeon Dumdum, Jr. nga tigsuwat ning atong pamantalaan.
Jun o Sir Jun maoy kasagarang itawag namo ni Dumdum ug Sawi o Sawi Fox mao say kasagaran namong tawag ni Aquino. Na-panelist kining duha sa Silliman Writers Workshop (diin si Sawi, regular ug si Jun mo-guest panagsa) ug sa Cornelio Faigao Writers Workshop.
Kun unsay hinungdan nganong small caps puros ang letra sa ulohan sa libro ni Jun nga “to the evening star” wa ako masayod. Hinuon sama sa usa ka balak may dalang tanghaga ang hulagway sa cover. Kinahanglan mo kining tutokan aron mo masakpan ang pagkasipat niini.
Gipahimo ko ni Sawi og cover ning iyang “Caesuras: 155 New Poems” apan wa kini mauyoni sa publisher. Sa Facebook ko ra nakita ang cover sa libro ni Sawi unya gamay ra kaayo ang hulagway niani mao nga di ko kini ma-describe niani sa pagkakaron. Ang University of Santo Tomas publishing House maoy nagpatik ning duha ka mga libro. Ang mga interesado makatawag UST publishing house sa 4061611 local 8424.
Duna koy kopya sa kang Jun nga libro samtang may mga nabasahan akong pila ka sample sa kang Sawi sa iyang Facebook. Sa ako lang mga nabasahan makaingon ko nga puros siaw kining duha nga may tagong gamay nga pagkasenti.
Daw nahimong magtitigmo si Sawi ning iyang bag-ong libro samtang naistoryador si Jun sa iyaha. Daw bali ang nahitabo kanila. Sa unang libro sa balak nga nasugatan ko kang Jun nga “Third World Opera,” mugbo ug daw tigmo ang iyang mga balak kun basahon. Samtang ang mga sinuwat ni Sawi sa “Word Without End” morag mga sugilanon nga gihan-ay para mahimong balak.
Wala akoy siguro kun ang mga balak ni Sawi sa Facebook apil ba sa iyang libro mao nga di ko mahatag og sample sa pagkakaron pero ania ang usa sa mga balak ni Jun:
Moonrise
And so, whoever/Night come along/Would never squeeze fruit/To check its ripeness/For she who owns/The leaning tree/Does not know that/The fruit now hangs/Over the fence– /Her Lover’s hand/Has her dreamy/And the hands of the passers-by/Have made the fruit/lean on the moon/as on its mother/
