Timplag kape
Usa sa akong favorite camera review site ang cameralabs.com. Ang host niani mao si Gordon Laing, opaw nga dunay British twang. Class ug laysho kaayo ang iyang pag pangayog donation gikan sa iyang mga readers: “If you find this review useful… I’d love a coffee.”
Isip usa usab ka coffee addict nahimuot kaayo ako sa pa-cute ni Gordon Laing.
Dili sama sa atong mga silingang nasud sa Southeast Asia nga hingape gyud ang ilang mga kagikan kita sa Pinas miangkat lang ning maong bisyo sa palami gikan sa western countries.
Dunay strange ug bizarre twist ang coffee drinking sa atong kultura: kun importante kang tawo dunay motimplag kape para nimo. And as a consequence, inferior intawon nga binuhat ang mokutaw sa imong kape.
Ug tuod man nisulod kining maong panghunahuna sa politika. Daw nahimong synonymous sa way alamag ang “tigtimplag kape.”
Ila kining gilabay ni Cory sa una. Nga wa kunoy hinungdang kandidato pagkapresidente si Corazon Aquino kay tigtimpla ra kuno kinig kape sa mga meeting ni Ninoy sa iyang mga political allies.
Dayon ila kining gihimong issue batok ni Erap, dihang gipatimpla kinig kape sa iyang kauban sa sugal. Dako kuno kaayong insulto nga ang presidente sa Pilipinas patimplahon lag kape sa iyang mga higala sa sugal.
Ug karon ang bag-ong giyab-an ning coffee flavored smear campaign mao si Nancy Binay, ang bag-ong senator nga anak ni Vice President Jejomar Binay. Giingon nga walay laing kamahoan si Nancy gawas sa pagtimpla og kape para sa iyang amahan.
Apan morag di makamantsa ang kape. Democracy icon na karon si Cory. Si Erap successful sa iyang political comeback. Ug si Nancy, senador na karon.
Tingali kay sama sa gikaingon ko na, dili kita indigenous coffee drinkers maong walay epek kining politikanhong pamubo og kape. Mas endemic practice pa tingali kanato ang paghigop og sikwate mao nga nilampos ang maong beverage pagsulod sa usa ka figure of speech kabahin sa usa ka di maayong hitabo. Mao nga makaingon kita nga “nasikwate” si Tomas sa bag-o lang miaging piniliay.
Tingali, ang symbolic aspect ra sa pagtimpla og kape ang nakit-an sa ilang mga detractors. Wa nila hunahunaa ang practical aspect nga “insider” sa mga plano ang mga tigtimplag kape.
