Gabaan baya mo sa mga tiguwang!
Alang nako wa na gyuy babag kun idayon ni Cebu City Mayor Michael Rama karong Marso ang pag-distribute sa financial assistance alang sa 50 mil kapin ka mga senior citizens dinhi sa dakbayan sa Sugbo.
Ang paggahin ug P600 milyones ug ang bag-ong resolution nilang City Councilors Jun Pe ug Rodrigo Abellanosa nga mga sakop sa Bando Osmeña Pundok Kauswagan (BO-PK) nga naghangyo kang Mayor Rama nga i-release ang financial aid pinaagi sa matag buwan, bug-at na kaayo kining mga sukaran sa pagpang-apod-apod ni Mayor Rama pun-an pa sa petisyon nga pirmado sa halos tanang mga senior citizens.
Anhi masukod kun unsa ka sinsero ang taga “TYPE O” ug “BO-PK” sa pagpahumot ngadto sa mga tiguwang nga mosakay sa tinguha nga mapadali ang pagpanghatag.
Akong nasabtan ni Cebu City Councilor Noel Wenceslao nga sakop sa BO-PK atol sa among programang “Dialogue on the Air” sa dySS niadtong Sabado nga kun ipanghatag ni Rama nga way klarong pagtugot sa konseho nga gi-dominar karon nila sa BO-PK mapugos sila sa pagkiha sa Ombdusman Visayas.
Apan si Cebu City Councilor Joey Cortes Daluz nga usa ka abogado nga miembro sa “Team Rama” miingon nga iyang tambagan ang mayor nga i-release na gyud ang kuwarta alang sa mga tiguwang kay gikinahanglan na gyud kaayo alang sa maintenance sa tambal.
Gawas pa sab tinunto kaayo ang bag-ong proposal nga ipaagi ug binuwan ang pag-apod-apod kay klaro kaayo ang motibo nga dili ipahatag sa taga Bando Osmeña Pundok Kauswagan karong Marso kay adto na sa Hunyo nga palabyon ang May 2013 election.
Dili intawon madalag magic ang pagpasar og amendatory ordinance pun-an pa sa pagpapublikar.
Segurado ko nga kun mosakay si Rama sa laang sa BO-PK maabtan silag election ban karong Marso 29.
Gipasabot ni Konsehal Daluz nga wa silay supak sa sugyot nga ipaagi og binuwan ang pagpang-apod-apod pero unya na kini tungod kay wa pay klarong sistema.
Matud ni Daluz nga kagidlay man gani nga ipaagi matag quarter, unsa na kaha kun kada buwan nga di gyud makaya sa mga tinugyanan.
* * *
Daghang mga professional squatters ang nagpahimolos karon niining pagka-suspenso ni Gwendolyn Garcia pinaagi sa pagtukod sa ilang mga panimay sa province owned lot luyo sa among complex GMA-7.
Niadtong Sabado misuway ko pag-agi sa kanhi VISCOM View Park ug akong nakit-an nga dunay daghang mga tawo ang nagsukod-sukod sa ilang mga puwesto.
Dihay akong nakit-an nga nagbitbit ug bara de kabra nga gikan nangguba sa mga koral.
Kun mapasagdan kini ni Acting Gov. Agnes Magpale delikado nga dunay magpatay diha sa puwesto kay iyahay naman og angkonay.
Niadtong wa pa masuspenso si Gwen dihay giporma nga Cebu Provincial Properties Protection Task Force nga naglangkob sa mga guwardiya aron maoy mobadlong ug mobabag niadtong magtukod og mga panimay.
Ambot kun naunsa kadtong maong task force. Kay sukad nasuspenso si Gwen wa nay nag-atang-atang nga mga guwardiya sa mga tawo nga mosulod diha.
Maglaum ko nga ma-protektahan ni Acting Governor Magpale ang mga luna sa provincial government kay kun di kini mahatagan ug pagtagad akong panawgon kadtong taga-probinsiya nga anaa nanimpaad dinhi sa dakbayan nga moangkon og puwesto kay sa mga professional squatters nga nagsigeg pahimoulos sa lote sa Kapitolyo.
* * *
Magpasalamat ko nila ni Acting Gov. Agnes Magpale ug ni Provincial Board Member Arleigh Sitoy nga nagtuon karon og pipila ka mga kausaban aron mapalapdan ang serbisyo sa Kapitolyo ngadto sa mga Sugboanon.
Apan in fairness kang suspended governor Gwen Garcia, siya maoy nakauna sa idea nga magtugot sa mga regular nga mga kawani sa Kapitolyo nga mag-flexible ang schedule.
Kini gituyo aron makaserbisyo silang taga Kapitolyo gikan sa alas-8 sa buntag hangtud sa alas-6 sa gabii. Kaniadto man gud basta alas-5 na sa hapon sirado na ug mingaw na ang Kapitolyo unya daghan ang maalanganin sa transaksiyon.
Akong nahibawo-an nga dul-an na duha ka tuig ang implementation sa flexible schedule sa halos tanang departamento diha sa Kapitolyo.
Nagtuo ko nga wa lang masayod si kagawad Sitoy sa flexible nga schedule nga gipatuman ni Gwen sa mga regular nga mga trabahante.
Mas labing maayo kun ipatuman ang susamang paagi ngadto sa mga trabahante sa Cebu Provincial Board.
Ang laing butang nga kinahanglang tun-an nilang Magpale mao kining ubang polisiya nga detrimental kaayo sa public service.
Sama pananglit sa existing policy diha nga kinsa kadtong mga kawani sa Kapitolyo nga dili makaabot sa flag raising ceremony sa adlawng Lunes automatic nga half-day absent na siya.
Di ba sobra ra sab kaayo kining paagiha? Alang nako insakto naman tingali nang sistemaha nga kun magsigeg ka -late imbestigahon unya suspensohon sa trabaho.
Ang punto man gud nako niini mao nga apektado kaayo ang serbisyo publiko kay kinsa pa man ang moserbisyo ni Juan Dela Cruz?
Bisan tingali kun akoy nahingtungdan nga trabahante nga dili makaabot sa flag raising tungod sa problema sa traffic mouli na lang sa bay aron manglaba, mangutaw ug mamughag kahoy kay automatic half-day absent man.
* * *
Tinun-an sa kinder sa Lahug Christian School maoy pinaka-latest nga casualty niining sakit nga dengue dinhi sa dakbayan sa Sugbo.
Niadtong Biyernes sa hapon akoy naluoy sa mga ginikanan sa bata nga nanaglumba intawon sa pagpanghilak nga nagsud-ong sa lungon sa ilang bugtong anak nga si Sam Andrey Gabucan didto sa Sacred Heart Parish Church.
Ang pamilyang Gabucan nga wa pay tuig nga namalhin didto sa Guadalupe-Kalunasan nagtuo nga ang nagpundo nga tubig sa sapa nga gikan sa Cebu Provincial Detention and Rehabilitation Center kon CPDRC maoy gipuy-an sa lamok nga nagdalag dengue.
Maglaum ko nga wa mapasagdi sa atong mga politiko kining maong problema taliwa nga nagkaduol na ang ilang bugno politika.
