Quantcast
pork barrel

Super Hirit

Go Jaguar! Adelante forward!

By |


Sa di pa sa mga isyu, pagkapaspas gyud sa panahon kay wa lang damha nga  mi-abot na diay kami ug 15 ka tuig dinhi sa Cebu Daily News (CDN) ubos sa very dynamic, energetic and trusted leadership ni Ma’am Eileen Mangubat.

Puwera buyag nagpabiling consistent nga credible ang CDN ug  kini maoy among tamdan nga prinsipyo.

Again congratulations ug Happy 15th Anniversary sa CDN family.

* * *

Sangko sa langit akong kalipay dihang nagpahibawo ang administration sa University of San Jose Recoletos (USJ-R) nga ilang papasohon atul sa commencement exercises karong Marso ang ilang graduating student nga babaye bisan nga nalambigit sa kontrobersiyal nga sex video scandal.

Insakto kaayo ang desisyon sa USJ-R ug angay gyu’ng saludohan ug daygon.

Di parehas sa ubang catholic school dinhi sa Sugbo nga magpasulabi  sa pagka-estrikto ug pagka-perfectionist unya makapasukwahi na hinoon sa mga pagtulon-an sa Diyos nga mao ang pagkamapinasayloon sa mga nakasala ug sa isig ka-ingon.

Ang tawo nga nasukamod dili angay’ng yatakyatakan kun dili kinahanglang agakon siya aron makabangon.

Ang sayop dili maayong pun-an ug laing pagpakasala.

Kinsa man gud ang way sala nato sa Ginoo?

Gipasalig nga di lang kutob nga  papasohon kay andam ang eskuwelahan  nga mo-release sa iyang diploma, grado ug ubang mga dokumento nga gikinahanglan sa pagpanarbaho.

In fairness sa USJ-R  akong nahibaw-an nga sukad pa sa sinugdanan sa  pagbuto sa isyu consistent na sila sa ilang baruganan nga papasohon gyud ang estudyante ug way silot nga ipahamtang.

Matud sa akong tinubdan nga mugna lang sa huna-huna ni  Atty. Inocencio Dela Cerna unang abogado nga taktakon ang tinun-an ug dili papasohon.

Ebedensiya  sa USJ-R nga seryoso nilang gitabangan ang bata mao nga wa nila putla ang pag-practicum.

Gawas niini ang laing subjet sa  biktima parte ug luto-luto gipa-agi nila ug sekreto sa bay sa usa sa mga professor aron dili  mabugal-bugalan sa ubang tinun-an.

Puwera buyag maayo gyud ug utok ang biktima ug gani nagtoo ko nga makuha pa niya ang pagka Cum Laude karong  Marso kay nakakuha  kini  ug 1.5 nga grado  sa iyang thesis pun-an pa nga maayo gyud siya ug academic records.

Maglaum ko nga sa iyang pagdangop sa National Bureau of Investigation (NBI-7) uban sa iyang  inahan maghatag kaniya ug hustisya aron  itaral  ang  nag-upload sa  iyang sex video sa internet.

Asa man tuod ang kanhi yab sa biktima? Angay sab segurong susihon sa taga NBI kun nganong wa kini mopakita ug mobarug sa iyang pagka-lalaki.

Kun ako pa seguro sa dapit sa lalaki akong pangayoon sa  kamot sa mga ginikanan ug sa  pamilya sa babaye nga  pakaslan aron tuldukan ang isyu ug ipatigbabaw ang tim-os nga paghinigugmaay.

* * *

Overacting ra  kaayo ang mga NBI agents  niadtong Biyernes  dihang midangop  nila ang estudyante nga biktima sa sex scandal uban sa iyang ginikanan ug  administration sa USJ-R.

Tungod sa pagka OA sa taga NBI nagbagolbol intawon ang akong mga kaubanan sa buhat kay wa sila tugti nga  makasulod ug kutob ra sila sa  pultahan kay dili pakuhaan ug video ang tinun-an.

Nakasaway ko  sa ilang gihimo ngadto namo’ng mga sakop sa media kay mora’g  ilang gikuhaan ug kabu-ot.

Nasayod na intawon mi sa among obligasyon ug responsibilidad basi sa balaud  pag-protihir sa identity sa biktima.

Amo na kanang  diskarte kun unsa-on pag-pingis-pingis sa camera ug gani bisan niadtong  wa pa modangop ang esudyante sa NBI consistent na ang mga TV networks na nagtamod sa media ethics ning maong eskandalo.

Dihang akong  nakit-an sila’ng  Nestor Ramirez ug Karlon Rama nga among  mga  kanhi kauban nga nagtudlo na karon sa USJ-R mao nga  nangahas ko sa pagsulod.

Bisan si Karlon mipalag sa gihimo sa taga  NBI nga itago-tago namong mga sakop sa  media ang  biktima.

Ang resulta hinoon sa  katapusan nahug nga mora’g suspect sa daku’ng krimen  ang estudyante dihang migawas na sa NBI human ilang gipasul-ob ug dark eye glasses ug gipakalo.

Pero taliwa sa gihimo sa taga NBI nagbaton gyud ug respeto ang mga cameramen ug mga  photographers kay wa na sundi ang tinun-an  paggawas human among nasabutan nga dili nalang siya sundan aron dili  ma-eskandalo sa gawas nga atua didto ang daghang mi-process sa ilang NBI clearance.

* * *

Sugod na gyud ugmang adlawa Feb. 12 ang  pormal nga pagpangampanya sa  mga kandidato sa  pagka-senador ug sa party-list representatives.

Samtang sa Marso 29 ang pagsugod sa campaign period sa mga milansar  pagka-kongresista, pagka-provincial, city ug  municipal  officials.

Sa kalendaryo  sa COMELEC  taposon ang campaign period sa May 11, 2013.

Akong tan-aw ugmang  adlawa lumba lang ug pahambugay ang mga dagkung  political party  sa nasud sa ilang opening salvo.

Ang “Team Pinoy” nga iya  ni presidente Noynoy Aquino adto sa  kauluhan  mosubo  sa ilang kampanya samtang ang United Nationalist   Alliance kon UNA nga ila  ni Vice President Jejomar Binay ug kanhi presidente Joseph Estrada anhi sa Sugbo magsugod  diha sa dakbayan  sa  Toledo.

Kun pamintaha  maoy hisgutan pulos  nakalapas  ni’ng mga  pulitiko kay bisan  layo  pa ang campaign period  nagsige na’g pangampanya. Bisan sa atong  mga  local candidates nanaglumba lang ug display sa ilang mga  nawong.

Ang  labing salikwaot nga duwa mao ang campaign ads sa “Team Pinoy” pinangulohan sa presidente kay bisag wa pay kampanya gisugdan na nila pagpa-broadcast sa mga TV networks.

Abi ba nako nga tarong si Pnoy ug  dili  malapason sa  lagda. Otro man  sab  diay. Pagka-paet ning  magpaka-aron ingnon nga  “law abiding citizens”.

Mao ni ang gipasi-atab sa presidente nga adto  nata sa “matuwid na daan”?


Follow Us



More from this Column:


Recent Stories:

Complete stories on our Digital Edition newsstand for tablets, netbooks and mobile phones; 14-issue free trial. About to step out? Get breaking alerts on your mobile.phone. Text ON INQ BREAKING to 4467, for Globe, Smart and Sun subscribers in the Philippines.




Copyright © 2014, .
To subscribe to the Philippine Daily Inquirer newspaper in the Philippines, call +63 2 896-6000 for Metro Manila and Metro Cebu or email your subscription request here.
Factual errors? Contact the Philippine Daily Inquirer's day desk. Believe this article violates journalistic ethics? Contact the Inquirer's Reader's Advocate. Or write The Readers' Advocate:
c/o Philippine Daily Inquirer Chino Roces Avenue corner Yague and Mascardo Streets, Makati City, Metro Manila, Philippines Or fax nos. +63 2 8974793 to 94
Advertisement
Advertisement
Marketplace
Advertisement