2013 –a political year
Mitawag si Raffy nga ipasayo kunog pada kining maong lindog kay mangulig sayo ang mga taga-editorial para mosugat sa tuig nga 2013 sa ilang tagsatagsa ka panimalay. Idukdok ko na lang kun unsay man gali motingkagol sulod ning bagulbagol.
* * *
Kon nagbasa kamo karon nianing maong lindog, maayong 2013 kaninyo. Diin man mo pag alas dose ganina? Murag si Gwen ug ang pamilya Garcia diha maabtig bag-ong tuig sa Kapitolyo. Maabtan kahag Sinulog kining atong kaguliyang sa Kapitolyo?
Kun moabot man ganig Sinulog kining maong kagubot, makasayaw pa kaha ang gobernadora nato? Dunay moingon nga di na kini mosayaw kay di man kini mogawas sa iyang opisina. Apan duna say moingon nga mao na kini ang higayon nga mobiya na lang gyud siya sa iyang opisina kay maputol unya ang tradisyon sa iyang paghalad og sayaw sa Senyor. Apan may misugyot pa gyud og laing posibilidad. Sa sulod na lang kuno sa Kapitolyo mosayaw si Gwen og i-live telecast na lang kuno ang iyang pagsayaw. Pwede kuno nga magbutang og dakong screen ang usa ka float ug adto ipasundayag ang iyang performance. Ug inig abot sa float sa sulod sa Abellana adto na lang i-project sa bungbong sa entablado ang iyang sayaw.
Apan may moingon sab nga hangyuon na lang kuno ni Gwen si Magpale nga maoy mo-proxy kaniya kay total mao man kini ang acting governor.
Daghan hinuon ang gatuo nga maresolbar kining problema sa Kapitolyo sa wala pay Sinulog. Morag karong Huwebes kuno kini mahuman. Mobalik man gud kuno sa korte ugma, Miyerkules, petsa 2, ang huwes nga gipangayoan sa kampo ni Gwen og temporary restraining order. Ug kun unsa man gani hukom sa huwes ipatuman kini sa pulis inig ka Huwebes petsa 3. Posible hinuon nga malangan pa kinig gamay kay basig dili makahukom dayon ang maong huwes o di ba hinuon ma-absent kini tungod sa hang-over sa pagsaulog sa bag-ong tuig.
Morag nitan-aw si Noynoy sa sayaw ni Gwen niadtong miaging Sinulog. Wa tingay malipay ang President sa sayaw sa gobernador ug maong gisuspenso niya kini sa nagpadung pa ang Sinulog para dili kini makasayaw karong tuiga.
* * *
Sa pagtan-aw ko lang sa pelikulang El Presidente ko nasabti kun nganong kinahanglan gyung patyon si Andres Bonifacio sa kampo ni Aguinaldo.
Sa dayong pag-alsa sa pundok ni Bonifacio nga Magdiwang naunhan sila sa mga Katsila, hinungdan nga nanagan sila ug nakatag. Daghan kanila ang midagan ug mitipon sa Magdalo, nga pundok ni Aguinaldo. Ubos sa kahadlok nga usausahon silag patay sa mga Katsila midiklarar na lang si Aguinaldo og usa ka independenting republika sa Cavite.
Apan diha pa may pundok si Bonifacio mao nga nagsabot sila nga ilang usahon ang duha ka pundok ug magpili silag mga opisyal. Dihang wa makontento sa resulta si Bonifacio mibuwag kini ug nagsige nag panghasi. May laraw usab kini nga mopatay kang Agunaldo.
Kay dili man buot mopirma si Aguinaldo sa kamatayon ni Bonifacio gihangyo lang kini sa iyang mga magtatambag nga mopirma lang nga siya mouyon sa bisag unsa may hukom sa konseho nga miimbestigar kang Bonifacio. Ug tuod man gipapatay gyud nila si Bonifacio.
* * *
Kun politika ang tema sa atong lindog karon, tungod kini kay usa ka politikanhong tuig kining 2013. Niadto lang Sabado nag rally ang Bando Osmeña Pundok Kauswagan sa among lugar ug misyagit ang congressional candidate niani sa South destrict nga si Bebt Abellanosa og–oooo, oooo, oooo, Type O, Gangnam style. Wa na lay diskursohay.
