No to World peace
Nyor Gamay (NG): Maayong Pasko, Nyor!
Nyor Daku (ND): O, Merry Christmas, Nyor. Ikaw man diay na. Didto ka namasko sa Capitol, Nyor?
NG: Pagka hanggaw gyud nimo Nyor. May mag paryente ming Gwen Garcia. Unya dili sad ko police. Magunsa man ko didto?
ND: Gatuo man gud ko nga nanguryuso ka.
NG: Pastilang gubutas kapitulyo. Murag hangtud rong New Year di pa na sila katilaw og kalinaw.
ND: Hahaha. Makahinumdum man sad kos Miss Universe anang imong gipanulti.
NG: Ngano gud tawon? Unsa may connection sa Miss Universe sa kapitulyo?
ND: Nakahibawo ka kon nganong first runner-up ra ang Miss Philippines?
NG: Sa ako lang pangagpas Nyor gi-top two ang Pilipinas ug USA tungod sa mga trahediya nga natagamtam intawon ning duha ka nasud. Bag-o pa tang naigo sa Pablo niadto ug ang USA naigo usab sa Sandy ug sa kadtong mass shooting sa mga bata sa usaka eskwelahan sa Newton, Connecticut. Sa duha Nyor, murag mas bug-at ang natagamtam sa America kay dili lang ang kinaiyahan maoy nidagmal kanila. Usa kanila ang miunay pagpatay sa mga inosinti. Ilang produkto, ila rang kaliwat ang mihatag nilag kasakit.
ND: Sa ato pa Nyor wa diay ka gwapahi ni Miss USA? Kay gatuo man ka nga ang politika sa kaluoy maoy nakahatag kaniya sa korona sa Miss Universe.
NG: Ayg ka lain Nyor ha…pero mas gigwapahan man ko sa Miss USA kay sa tong kandidata.
ND: Mas nay dughan ang Miss USA.
NG: Dughan ra may giatiman sa animal.
ND: Wa tuyo-a Nyor. Maoy akong nakit-an. Pero pagabot sa top five, bisan pa man sa dughan ni Miss USA, gatuo ko nga modaug na atong manok kay siya ra may dili Caucasian nga nahabilin.
NG: Uyon ka akong sugyot nga politikas kaluoy ang gibasihan?
ND: Medyo. Pero may nabasahan man gud ko nyor nga pweding sa question and answer kuno.
NG: Mas maayo man ang tubag sa atong manok.
ND: O pero gipul-an na kuno ang mga judges ang mga lawum, siryuso ug profound. Mas ganahan na kuno ron ang mga judges og personal ug spontaneous ug kanang gaan ug relax ra nga tubag. Murag miabot na ang saturation point ang mga tubag nga may kalabutan sa world peace, essence of a woman, global warming, sexual exploitation ug uban pang world issues. Ang tubag sa Pilipinas kabahin sa Iniglis medyo lawum pero dili personal. Ang sa USA kabahin sa bullying pero iyang gi-personal kay kabahin man sa iyang pagpanungog sa iyang mga manghud.
NG: Unsa may imong i-sigyot nga tubag sa sunod natong kandidata puhon.
ND: I-personal ug tubag ug likayan ang pag discuss sa world peace ug uban pang current events.
