Super Hirit
Si Robrero ray sentro sa search and retrieval?
By Lloyd SuarezCebu Daily News
With all due respect, akong naobserbahan kagahapon nga ang patayng lawas ra ni Interior and Local Government Secretary Jesse Robredo ang gisiguro ug gihatagan og prayoridad sa mga divers nga maoy hinungdan nga siya ray naugkat pag-una.
Kay kun patas pa unta ang mga technical divers ug tanang nalambigit sa search and retrieval operations ilang gidungan pagkuha ug gidala sa lapyahan ang tulo ka mga patayng lawas nilang Robredo, Capt. Jessup Bahinting ug sa tinun-an nga piloto nga Nepalese national nga si Kshitiz Chand.
Dili makabasol si Secretary Mar Roxas nga mapasanginlan siya nga way kaangayan ngadto sa pamilya nilang Capt. Bahinting ug Chand kay siya mismo maoy mipagawas og estorya kagahapon sa buntag nga dihang naestablisar ang lugar sa nahimutangan sa mga biktima nakit-an nga naka-seatbelt pa ang tulo sud sa naguba nga eroplano.
Nganong wa na man lang baliki og salom sa mga divers sila si Bahinting ngan nga miabot og 600 ka mga rescuers?
Unsa may papel sa uban? Pasikat ug pagsamok-samok?
Unsa ka tinuod nga nahilom og kalit didto sa Masbate dihang gikarga na ang patayng lawas ni Robredo paingon sa Naga City ug nibiya sab ang ubang technical divers?
Dihang nakabantay sila si Roxas ug ubang nagdala sa command center mipagawas dayon og depensa nga di madali-dali ang paghaw-as kay ngitngit kaayo didto sa ilawom unya nahutdan og oxygen ang mga divers.
Unya mipagawas na sab sila og laing conflicting report pagkahapon nga lisud kuhaon ang patayng lawas nila ni Bahinting kay atua sa gilawomon nga 220 ka tiil nga sukwahi kang Robredo nga anaa lang sa 180 ka tiil ang gilawomon. Ambot unsay klaro nila?
Kagahapon sa mga alas-3 akong gitawgan si City Traffic Operations Management Chairman Jack Jakosalem sa update sa retrieval operations apan gipasabot siya ni Secretary Mar Roxas nga lisud ugkaton ang mga patayng lawas kay na-usab ang porma sa eroplano nga maoy nakapalisod sa mga Korean divers pagkuha sa patayng lawas nila ni Bahinting.
Mao ni ang nakasakit kay inay mag-inunongay gibiyaan na lang sila si Bahinting nga unta kun wa pay kakulian ang ilang paglupad ikalipay unta kaayo sa pamilyng Robredo ang pagpangunay ni Capt. Bahinting paghatud sa kalihim sa ilang lugar nga nagdali aron maka-abot pa unta sa awarding sa iyang anak nga si Jillian nga midaug og medalya sa swimming competitions sa ilang rehiyon.
* * *
Makapungot kaayong paminawon nga dunay motabang pag-rescue sa mga biktima sa trahedya unya mao na hinoon ang tabangonon.
Susama kini sa migawas nga breaking news kagahapon sa buntag nga human nakit-an ang patayng lawas ni Interior Secretary Jesse Robredo gikataho usab nga dunay Bolcov helicopter nga iya sa Philippine Navy ang giingong nahagsa didto sa Donsol, Sorsogon.
Ang helicopter sakop sa search and retrieval operations alang sa mga nahibiling mga piloto nga wa pa igkita.
Apan in fairness sa mga kadagkuan sa Philippine Navy dali nga mihatag og correction sa balita ug miklaro nga wa nahagsa kun dili igo rang nag-emergency landing tungod kay nag-mechanical failure.
Pero naklaro sa estorya nga palyado ang maong chopper sa Philippine Navy.
Ang ako ba nganong magmantinil gihapon ta niining mga eroplano ug helicoper nga mga karaan ug gubaon nga maghatag ug risgo sa kinabuhi sa mga magsakay.
Kanus-a man mo-estrikto pag-inspection ang mga ahensya sa gobyerno sa tanang matang sa sakyanan sa kamad-an?
Unya na kun dunay laing presidente sa nasud ang mahagsa?
Laing problema kagahapon sa operations kay dunay German national nga sakop sa technical divers ang gitabang kay nawagtangan sa panimuot.
Unya ang nakapait kay gisuspenso na sab ang retrieval human sa hitabo sa German national kay delikado alang sa mga divers kun magpadayon.
Magpaabot na sab kita karong adlawa og dugang kalambuwan sa search and retrieval operations.
* * *
Tanang mga opisyales, mga amigo ug silingan kang DILG Secretary Jesse Robredo pulos gyud nakadayeg sa iyang mga maayong binuhatan ilabina sa iyang pagka-kugihan.
Si Robredo 54 anyos ug natawo siya niadtong May 27, 1958. Nakahuman siya sa mga kursong industrial management engineering ug mechanical engineering sa De La Salle University.
Nakabaton siya ug tulo ka mga anak kang manlalaban Leni Robredo.
Niadtong 1988 nahimo siyang Mayor sa Naga City diin niadtong higayuna giisip siyang “youngest Philippine city mayor” sa edad nga 29. Tungod sa kaayo niyang mangalagad hapit moabot og duha ka dekada ang iyang pagka-mayor sa Naga City.
Pagka 1992 siya maoy chairman sa Regional Development Council sa Bicol Region ug nagsilbi siya pagka RDC chairman hangtud 1998.
Na presidente sa League of Cities of the Philippines pagka 1995.
Pagka 2000 nakadawat siya sa prestigious awards nga gitawag ug Ramon Magsaysay for Government Service.
Giila usab ang kalihim sa Asiaweek magazine human milampos siya sa pagpagitib sa Naga City nga usa sa mga malamboon nga lugar sa tibuok Asya.
Lakip sa iyang nadawat nga pasidungog mao ang Outstanding Young Person of the World, Outstanding Youngmen of the Philippines ug Dangal Ng Bayan Awardee ng gipahigayon sa Civil Service Commission.
Tungod sa iyang kaligdong sa pagpangalagad gikuha siyang DILG Secretary ni Presidente Noynoy Aquino niadtong July 2010.
Follow Us
More from this Column:
- Angayng ibartolina si Joavan
- Davide for president sa 2016
- Sobra pa sa pusoy ang mga pildero
- Imposible gyud nga mahitabo ang failure of election
- Congrats sa PNP Talisay
Recent Stories:
Tags: Jesse Robredo
