Super Hirit
Way kawatan nga moangkon
By Lloyd SuarezCebu Daily News
Abtik kaayo si manlalaban Caesar Tabotabo, legal counsel ni Amparo Balili nga mitubag sa akong pangutana kun magdungan ba ug mag-usa ba ang pagduso nila og motion for reconsideration sa resolusyon sa Ombudsman Manila bahin sa kasong graft subay sa anomalosong pagpalit sa Balili estate.
Alisto kaayong nakapasupot sa iyang huna-huna si Tabotabo atubangan sa mga nagdungan og piyansa apil na ang kliyente si Amparo, manlalaban Romeo Balili ug kanhi Provincial Board member Juan Bolo nga maglain-lain gyud sila og duso og motion for reconsideration pag-establisar nga wa gyuy conspiracy sa maong transaksyon pagtunto sa gobyerno.
Pero ang di nila ikalimod sa publiko mao nga nagdungan gyud sila og piyansa sa Regional Trial Court Branch 10 sa kang Vice Executive Judge Soliver Peras.
Kun way conspiracy nganong nagdungan man sila og piyansa sa korte? Grabeha sang sulagmaa nga nag-abot gyud sila og piyansa nga unta si Bolo atua na man sa Dapitan nagtikaw-tikaw sumaa pa niya.
Si Bolo namahayag nga nadamay lang siya sa transaksyon. Apan in fairness niya iyang giklaro nga sa iyang habig wa gyuy tinunto apan dili siya makasulti sa uban.
Buot ipasabot ni Bolo nga limpyo gyud siya sa maong transaksiyon. Apan dili siya maoy arbiter sa kaso.
Sama nilang Amparo ug Romeo Balili nga nabalaka sa outcome sa kaso kay di gyud matag-an ang tanan.
Apan sigurado sila nga wa gyud makigkonsabo ug legal ang transaksyon. Hinuon, wa gyuy kawatan nga moangkon.
Apan unsa ka tinuod nga dunay pundok nga moduso og motion for partial reconsideration aron iapil sa kaso ang tanang nakapirma og dokumento ilabina ang mga sakop sa Provincial Board kaniadto ngan nga sila maoy naghatag og authority ni Gov. Gwendolyn Garcia basi sa tulo ka mga resolusyon nga napalabang?
* * *
Manghinaut ko nga dili na libugon og balik ni Land Transportation Office Director Raul Aguilos ang publiko bahin sa ilang implementasyon sa Republic Act No. 10054 kon Wearing of Standard Helmet Law.
Lahi na ang moingon nga estriktohon na gyud ang pagtuman sa balaud effective karong Aug. 1. Kay kun estriktohon dinakpanay na gyud niadtong mag-helmet nga wa pay sticker nga may marka nga “ICC” o “PS.”
Daghan intawon ang naglibog sa pamahayag ni Director Aguilos atol sa sesyon niadtong Lunes sa mga sakop sa Cebu Provincial Board nga siya miingon nga ila gyung ipatuman karong Aug. 1 ang RA 10054.
Mao nga nangahas kog interview niya sa akong radio program sa dySS Super Radyo ug iyang giklaro ang tanan.
Ang mga bug-at niyang punto atol unya sa Aug. 1 mao nga dakpon na gyud kadtong dili magsul-ob og helmet.
Dakpon sab kadtong maghelmet ug construction helmet, military hat, pinutol nga bola ug kadtong magsul-ob og helmet sa biseklita.
Lakip sa dakpon kadtong mga karaang helmet nga buak na ug kadtong nangaputol ang strap.
Iya sang gitin-aw nga wa pay dakop niadtong mga helmet nga gikan sa mga tindahan sa Insik nga tagsa ka gatos kapin ang presyo nga half-face basta duna pay strap nga kini maoy sagad gigamit karon.
Giklaro usab ni Aguilos nga unya na gyud sa Enero tuig 2013 ang estriktong dinakpanay niadtong mag-helmet nga way tatak “ICC” o “PS.”
Hinaut nga klaro na kining tanan alang sa mga otoridad ug sa tanang deputized agents sa LTO aron way lalis nga mahitabo diha sa kadalanan nga mabastos ang atong mga tinugyanan.
Akong sublion nga way pobreng motorista nga gustong magpadakop ilabina nga daku kaayog multa alang sa first offense nga tag P1,500. Mapugos ug moutong na lang gyud og palit og bag-ong helmet nga may sticker nga “ICC” o “PS” mark.
Mapalit lang kini sa mga kabus karong umaabot Disyembre nga ting bonus kay kini ra sang panahuna nga makwarta-kwartahan ang katawhan.
* * *
Pagkayabag gyud niadtong 17 anyos nga batan-ong lalaki nga migulgol sa ubol-ubol sa iyang hinigugma nga maayong pagkadaut sa vocal chords nga posibleng di na makatingog sa tibuok niyang kinabuhi ang biktima.
Paita gyud kun selos ray hinungdan. Kuyaw ning klaseha sa mga tawo nga ingon ani nga di makapugong sa kaugalingon nga morag kinsa nga makapanag-iya nag kinabuhi.
Nganong naingon ani man kining maong suspetsado? Asa man siya nakakopya niini? Ingon ani ba ang iyang mga ginikanan kun mag-away?
Follow Us
More from this Column:
- Angayng ibartolina si Joavan
- Davide for president sa 2016
- Sobra pa sa pusoy ang mga pildero
- Imposible gyud nga mahitabo ang failure of election
- Congrats sa PNP Talisay
Recent Stories:
Tags: Amparo Balili , Balili estate , Caesar Tabotabo , Crime , Land Transportation Office , Ombudsman Manila , Raul Aguilos , Wearing of Standard Helmet Law
