Way mahitabong implementasyon sa helmet law?
Cebu Daily NewsKung nakaako pagkiha ang Dumaguete city government sa taga-Department of Transportation and Communications, Land Transportation Office ug uban pang ahensya aron way dinakpanay niadtong mag-motor nga di magsul-ob sa standard helmet, nganong di man makahimo si Cebu City Mayor Michael Rama?
Di ba pwede nga maka-intervene ang local government unit ning dakbayan sa kiha aron paglig-on sa kawsa sa dakbayan sa Dumaguete isip sakop sa hiniusang Central Visayas?
Labing tinuod nakahasol kaayo kini sa mga mag-motor kay mapugos gyud intawon pag-comply sa balaod pinaagi sa pagpalit og mga helmet nga mahalon kay simbakog maatlan sa mga manakupay nga deputized sa LTO.
Si City Traffic Operations Management Chairman Jack Jakosalem nga akong naistorya kagahapon miklaro gyud nga di sila mopatuman sa bag-ong balaod sa standard/prescribed helmet tungod kay duna nay ordinansa ang dakbayan sa Sugbo kabahin niini.
Akong nakita nga midapig sa mga kabus ang ordinansa ning Siudad ikomparar sa national law nga makabuslot sa bulsa kay pwerteng mahala gyud sa mga helmet.
Miingon si Jakosalem nga dili estrikto ang ordinansa bahin sa helmet dinhi sa Siudad kay makapasar gihapon bisan kadtong mga karaang helmet ug bisan wa sa lista sa mga branded nga helmet nga gipatuman sa taga-Department of Trade and Industry.
Gawas pa sab, miingon si Jakosalem nga ang lain nilang rason sa di pag-implementar sa standard helmet law tungod kay mas hatagan nila og prayoridad ang problema sa trapiko kay sa pagkuti-kuti sa mga gipangpatapot nga mga stickers sa mga helmet nga makahurot sa ilang oras.
Karon nahimong bakikaw ang implementasyon niini nga sugdan na karong Aug. 1 kay di mopatuman ang taga-Citom unya ang taga-DTI morag mga umang nga pwerteng langaya sa pag-process niadtong magpa-sticker.
Unya nahimong kwestyonable ang ubang mga guidelines sa DTI kay bisag lig-on kaayo ang mga helmet nga dalhon sa ilang opisina aron pataptan og sticker apan dili nila tugtan kay way brand ug kun may brand man wala malakip sa mga brand nga ilang gipangtugtan.
Unsa man sab ka-tinuod nga gipangtagoan sa mga negosyante ang mga helmet niining panahuna aron inig dinakpanay mopaburot sa presyo?
Di ba kini trabaho sa taga-DTI pagsilot sa mga negosyanteng bintahoso?
* * *
Gidimalas si Reynalado Teves ang branch clerk of court ni Metropolitan Trial Court in Cities Executive Judge Rosabella Tormis kay bisan bag-o pa niyang naserbisyohan ang unom ka buwan nga pagka-suspenso sa trabaho gumikan sa paghubog-hubog, mag-atubang na sab siya og laing usa ka buwan nga pagka-suspenso.
Nadutlan siya sa kiha ni manlalaban Edward Anthony Ramos nga mireklamo sa pagkaarogante ni Teves dihang wa dawata sa clerk of court ang document o pleading nga gi-file sa abogado sa kaso nga unta iya kadtong ministerial duty.
Si Teves misambingay nga ang Ginoo dunay purpose niining tanan.
Pero akong basa niini mao nga ang tuyo ra gyud sa Ginoo mao nga gusto siyag kausaban sa akong amigo.
Miingon ang clerk of court nga andam niyang serbisyohan dayon ang maong silot apan moduso gyud siya og motion for reconsideration.
* * *
Grabe gyud ka-brutal ang nahitabong pagpatay sa usa ka 13 anyos nga batang babaye didto sa Tabuelan nga gituhoang lugoson unta unya kay nisukol mao nga gipatay na lang unya gihagbong sa lawom nga atabay.
Ang suspetsado nga si Elmar Montecalvo, 34 anyos nga akong na-interview miingon nga di gyud siya makaako paghimo sa krimen kay matud niya pinangga kaayo niya ang bata.
Hinoon way kawatang moangkon.
Tinuud way eye witness ning maong kaso, pero ari ni daugon sa circumstancial evidence.
Ang mga silingan sa suspetsado daghan og mga nabantayan sa iyang mga linihokan pun-an pa nga dunay iyang mga gamit nga nakit-an didto sa crime scene.
Maglaum lang sab ko nga mangita ang kapolisan sa Tabuelan og dugang saksi sa kaso ilabina sa posibleng may kalambigitan sa krimen aron mas molig-on ang kaso.
Follow Us
Recent Stories:
Tags: Transport
