Inay magtinabangay, mamulitika hinoon
Haskang paita gyud niining duna tay kabanay nga maigo sa dengue ilabina kun critical level na ang platelet sa pasyente.
Magkagidlay gyud sa pagpangita og blood donor ang pamilya sa pasyente nga kakuhaan og fresh blood nga sama og blood type alang sa gitawag og platelet pharesis procedure.
Lahi ning prosesoha kay lab-as gyud nga dugo ang gikinahanglan. Di kini parehas sa uban nga pwede rang makabunlot og dugo gikan sa blood bank nga naka-stock.
Sama sa pag-umangkon sa among sister-in-law nga na-admit sa usa ka pribadong tambalanan tungod sa dengue, nadiin-diin intawon sa pagpangita og tawo nga maka-donate og dugo.
Dunay parehas og blood type sa pasyente apan ang problema di makapasar sa eksaminasyon kay ang mga pangkuhaan kuwang sa katulog, giubo, dunay skin allergy, dunay tattoo ug unya ang uban bag-o pa nakapakuha.
Kumusta na man tuod ang atong monitoring karon sa sakit nga dengue?
Akong nakita nga nag-ayo ra man ang pamulitika nila ni Cebu City MayorMichael Rama ug sa iyang mga kaatbang sa Konseho pinangulohan ni Vice Mayor Joy Augustus Young.
Magtuod-tuod na man hinuon sa ilang pagkainutil.
Naghi-usa pa lang ni sila alang sa blood-letting campaign, malipay pa nila ang katawhan.
Paglikay niining matang sa sakit, di ra man ni trabaho sa mayor ug sa ubang mga kadagkuan sa City Hall. Gikinahanglan ang tabang sa tanang sector ilabina gyud ang mga nagpuyo sa palibot.
* * *
Medyo risgo sa habig sa kapulisan, sa mga Cebu City Traffic Operations Management personnel ug sa ubang mga tigpatuman sa balaod sa panahon nga moimplementar na sa hingpit sa balaod nga mag-require sa tanang mag-motor nga magsul-ob gyud og prescribed helmet.
Kagahapon lang dunay pundok sa mga habal-habal driver nga akong gitunolan sa imbitasyon alang sa among programang “Dialogue on the Air” karong Sabado nga magtuki bahin sa isyu ang mipadayag nga kun dakpon gyud sila bisan sa ilang pagtoo nga lig-on pa ang ilang helmet duna gyuy dautang mahitabo.
Ilang gipadayag nga mopay naglisod sila sa pagpalit og bugas ug pagbayad sa binuwan sa motor nga ilang inutang unya dakpon pa sila.
Bug-at sa ilang buot ang pagtuman sa balaod kay daku ang ilang pagtuo nga dunay daghang mga opisyales sa Land Transportation Office (LTO) ang igo rang mangwarta sa implementasyon.
Usa na niini ang pagpangayo og komisyon sa matag palit sa helmet nga may markang “PS” o “ICC.”
Unsa man gyud ka alarming ang gidaghanon sa mga nabuk-an og ulo human wa magsul-ob og helmet?
* * *
Agig pamatasan ug respeto gikinahanglan gyud sa tanang mga airline companies sama sa Cebu Pacific nga mopahibawo sa ilang mga pasahero nga mag “off loading” o modiskarga ug mga bagahe kun mabug-atan ang eroplano.
Tinuod risgo kaayo niining matang sa transportasyon nga mag-overloading sa karga ug sa iyang gibug-aton.
Apan di man siguro lisud pahibaw-on ug pasabton ang mga pasahero kun dunay i-diskarga ang kompaniya sa eroplano.
Kun gipahibawo pa ang magtiayong Claudine Barreto ug Raymart Santiago ug mga kuyog di unta saputon si Claudine ug di unta mag-eskandalo sa management sa Cebu Pacific nga maoy nakaagni ni broadcaster Mon Tulfo pagkuha og video o hulagway ni Claudine nga misangpot sa pinatiray ug sinukmagay.
Practically kun nagkasinabtanay pa daan sila ni Tulfo ug Claudine di unta kadto mahitabo ang binukbukay sa airport.
Ang angayng subayon niini mao kung kinsay nanguna.
In fairness sa kampo sa magtiayong Raymart Santiago ug Claudine Barreto dunay mga nakasaksi sa kasalbahis ni broadcaster Mon Tulfo human nga iyang gitadyakan si Claudine dihang namugos nga kuhaon ang cellular phone nga gigamit sa pag-video sa pagkonprontasi sa actress sa taga Cebu Pacific nga wa ipaapil ug karga ang iyang bagahe nga may sulod nga mga importanteng butang sama sa gatas sa iyang mga anak ug mga dokumento.
Pero in fairness ni Tulfo duna say iyang version nga kun siyay paistoryahon gikalitan lang siya ug suntok.
Kinahanglang imbestigahon kini ug tarong sa mga otoridad kay akong nakita nga nag-usab-usab na si Mon sa iyang istorya.
Kun wa manumbag si Mon ug wa siya mamatid ni Claudine makatilaw kaha siya ug grabeng bun-og sa nawong?
Bisag kinsa sigurong bana nga nakakita sa iyang asawa nga gitadyakan og laing lalaki mogawas gyud ang pagkasalbahis!
