Dili gyud propaganda ang isyu sa mga pari sa Minglanilla
Unsay tinuod, mao gyuy mopatigbabaw!
Akoy gihilasan niining usa ka sakop sa media nga mihukom na
sa mga parokyano sa Minglanilla ug sa iyang mga kaubang sakop sa media nga ma-impyerno tungod sa pagsigeg komentaryo batok sa kaparian nga nakahimo og eskandalo diha sa Minglanilla.
Namasangil pa ning kanahan nga nagpagamit ang mga parokyano sa propaganda sa usa ka dakung opisyal sa simbahan.
Ambot kun nakadungog ba ning karaho sa “straightforward” ug “spontaneous” nga mga deklarasyon sa tulo ka mga sacristan?
Akong klarohon nga way ni bisan kinsa ang nagsugo o nag-impluwensya aron sawayon kining mga badlongon nga mga pari. Ang mga komentaryo nga negatibo naggumikan ra gyud sa pagkabadlongon niining mga alagad sa Diyos.
Ambot kun mao bay nasuya kining among kauban sa buhat o siya maoy nagpagamit sa mga pari human ang mga nangreklamo nga mga parokyano ug mga kanhi alagad sa simbahan didto nagpatabang ni Sir Bobby Nalzaro ug sa among network sa GMA-7 ug dySS.
Ma-impyerno na diay ang usa ka sakop sa media ug alagad sa simbahan kun igo rang nanginlabot ug nagpakabana sa isyu nga eskandaloso kaayo?
Kuyawan ko sa logic niining among kauban nga nagnilimpyo.
Ginoo ray nasayod ning tanan sa pagpakabana sa katawhan batok niining giila nga mga haligi sa simbahan.
Maayo tingaling tun-an niya kun di ba unang ma-impyerno kadtong kurakot sa industriya.
Prangka lang nga pagkaistorya dunay mga tawo nga miduol na kanako aron ipabadlong ang pagsigeg komentaryo ni Sir Bob batok nilang Padre Jojo Deligero.
Akong sublion dinhi nga dili intawon batasan namo nga mobadlong ug mopaputol sa isyu ug komentaryo sa among mga kaubang magsisibya.
Unsa gud tawon akong authority nga mobadlong ni Sir Bob nga akong idolo.
In fairness ni Sir Bob nga akong boss ug una sa duyan, wa ko makahinumdom sukad-sukad nga iya kong gibadlong ug gipaundang sa pagtuki sa akong mga isyu nga gihisgutan sa kahanginan kay anaa ang respeto ug kanunay gyud nga mopatigbabaw ang demokrasya.
Tungod sa demokrasya mopatigbabaw kanunay ang katungod sa usag-usa pagpadayag sa iyang huna-huna ug opinion sa mga isyu.
* * *
Supak gyud ang mga operators sa mga buses ug mini-buses nga himoon nang regular nga mga trabahante ang mga driver ug mga conductor.
Sila si Julie Flores ug mga kaubanan nga mga operators dinhi sa Sugbu mipadayag sa ilang pagsupak atol sa among programang “Dialogue On The Air” niadtong Sabado sa hapon sa dySS.
Matud nila nga alkanse gyud kaayo sila ning paagiha ug pabor sa mga tapulan nga mga driver.
Miingon ang grupo ni Flores nga dili gyud applicable dinhi sa Sugbo ang maong kamanduan.
Iyang giinsister nga kun ipaagi na og fixed rate mangayo sila og usbaw sa plitihan o ba kaha ipaagi na og agency ang mga driver ug mga conductor.
Sila si Director Ahmed Cuizon sa Land Transportation Franchising and Regulatory Board, Land Transportation Office Assistant Director Arnel Tancinco ug mga representante sa Department of Labor and Employment pabor sa isyu nga ipaagi una og insaktong consultation sa tanang mga stake holders aron way problema.
* * *
Nakasabot ko ni Inspector Rolando Pinili hepe sa Theft and Robbery Section (TRS) sa Cebu City Police Office nga nagmahay sa pamilyang Gotingco nga maoy tag-iya sa panimay diha sa Lahug nga maoy giabangan niadtong pundok sa mga tulisan nga napakyas paglungkab sa Gemmary Pawnshop.
Di lalim ang gipakitang paningkamot sa kapulisan sama sa pag-pick-up niadtong usa ka Baby Toring sa Balamban nga gituhoang sakop sa mga tulisan aron ilhon sa pamilya.
Ang kapulisan nagbalik-balik sa panimay sa mga Gotingco aron paadtoon sa ilang buhatan ug tan-awon si Toring apan wa gyuy bisan usa ka sakop ang mipatim-aw.
Dihang akong gihisgutan kining maong isyu ni-react sa akong programa sa dySS Super Radyo niadtong Huwebes sa gabii ang mga Gotingco.
Si Jonah Velez Espina nga in-law ni Aurora Gotingco mipasabot nga di sa ingon nga mieskapo ang pamilya sa obligasyon sa pagtabang sa kapulisan.
Iyang giasoy nga si Gotingco dili pa capable nga moatubang kay na-trauma pa samtang ang iyang duha ka mga anak pulos busy sa trabaho kay ang usa maoy nagtagad sa ilang amahan nga comatose samtang ang usa manager sa usa ka kompaniya.
Gipasalig ni Espina nga andam gihapong moayuda sila sa kapulisan sa mga mosunod nga mga adlaw.
