Erap jokes
Sa una, kon makabasa kag “Erap jokes” nagpasabut kinig mga bugal-bugal nga gitumong ngadto kang Joseph Estarda nga presidente pa niadto. Apan karon ang maong phrase duna nay sumpay. Complete sentence na. Sama sa “Erap jokes about why GMA refuses chopper ride.”
Lingin ang bola, kon sa basket pa, mao nga di kita makatag-an kon kinsay maka-angkon sa katapusang katawa. Apan nianing mga tungora nagkatawa si Erap. Nahimuot ang pangulo nga gipalagput tungod sa jueteng kay kon niadto siya maoy perming bugal-bugalan karon, libri na siyang mobugal-bugal. Hinuon ang press man sad may magsigi og agda kaniya pagpika kang Gloria nga maoy nipuli ug mipapriso kaniya. Matag dunay lihuk ang kampo ni Gloria, sulsulan dayon sa media si Erap kon unsay iyang opinion ni ani.
Adtong maiging lidug, ato unang hisgutan ang mga panahum ni Erap apan kay nibuto man lagi kadtong morhian abortion issue mao nga atong sang gi-sideline si Erap. Ug maayo ra sad kay mas daghan pa man diay siyang binuang nga ikayawit kabahin ni Gloria.
Niadto miaging semana, nagkanayon siya tali sa pagbalhin ni Gloria gikan sa St. Luke’s Hospital ngadto sa Veterans Memorial Medical Center diin na hospital arrest usab siya nga: “Hindi natutulog ang Diyos.” Mipuno pa siya nga usa kini ka poetic justice.
Miingon pa gyud si Erap nga di usa niya humanon ang iyang gihimong libro kay pun-an niya kini og usa pa ka chapter nga may kalabutan sa pagka bilango ni Gloria.
Dihang gipangutana siya kon kinsay gipasuwat niya sa iyang libro. Mitubag si Erap nga siya mismo ang gasuwat niani kay matud pa niya nga siya usa ka “computer literate.”
Midugang si Erap nga dili niya hisgutan ang iyang mga love life ning maong libro ka usa kini ka politikanhong autobiography.
Ug gahapon nga nabalhin na gyud si Gloria gikan sa St. Luke’s ngadto sa VMMC, mingisi na usab si Erap ug mibugal-bugal.
Dihang may namatikdan ang police nga duha ka pundok nga rallyista—pro ug anti Gloria—nga gatapok atubangan sa St. Luke’s, misugyot kini nga imbis by land ang pagbalhin ni Gloria by air na lang pinaagi sa usa ka chopper. Mihangyo ang grupo ni Gloria nga tumanon na lang ang unang plano nga pinaagi sa mga sakyanan sa kadalanan ang pagbalhin ni Gloria kay matud pa nila duna nay trauma si Gloria sa chopper ug gawas pa kusog kaayo ang uwan niadtong tungora. Ug tuod man miuyon na lang ang kapulisan sa maong hangyo.
Mibugal-bugal si Erap nga ang katarungang di musakay si Gloria sa chopper mao nga usa kini sa mga secondhand nga helicopter nga gibaligya sa iyang bana ngadto sa Philippine National Police (PNP) isip bag-o. Kon mahinumduman, daghan nang na aksidente ug nangamatay tungod niining maong chopper.
Ug dihang gipangayuan og panahum si Erap kon unsaon pagdala si Gloria ngadto VMMC, kini maoy iyang giingon: “If I may suggest, para walang hassle at walang traffic, I remember she took her oath at 3:30 a.m. at Batasan. Dapat yung transfer sa Veterans 3:30 a.m. Walang traffic, tulog lahat ng tao. Tulad ng pagsumpa niya nun, tulog lahat ng tao.”
With the current media exposure he has been getting, di na lang ta matingala kon modagan na usab kini si Erap ug modaug. Ang pagka mayor sa Manila man kunoy giplanuhan niani karon.
