Unlod gyud ang City Hall kun reenacted budget
Kun tinuod nga nahigugma sa dakbayan sa Sugbo sila si Kongresista Tomas Osmeña, iyang asawa nga si Konsehal Margot ug ang mga sakop sa konseho nga kaalyado sa Bando Osmeña-Pundok Kauswagan (BO-PK) nganong naabot naman sa ilang punto karon nga reenacted budget na lang ang gamiton sa 2012 inay ipasar ang P11.8 billion nga giduso ni Mayor Michael Rama?
Kun ambisyoso ra ang gipalabang nga budget ni Mayor Rama nganong di na man lang nila ibanan ang P11.8 billion nga sarang makalihok sila sa mga proyekto?
Wa koy supak sa ilang pagka- fiscalizer, apan kinahanglang dunay kaayohan nga mapaabot ang katawhan pinaagi sa paghatag og mga importanteng proyekto ug ang paghatag og tinud-anay nga mga basic services.
Unsaon man pagtagbaw sa katawhan kun magsige kitag babag nga way logic ug way igong katarungan?
Sama sa akong punto niadtong among programang “Dialogue on the Air” sa dySS nga mas maayong mo-personal nga mo-esplikar si Mayor Rama sa konseho sa iyang proposed budget.
Apan gitubag ko ni Mayor Rama nga wa siya imbitaha sa konseho ug gawas pa di na kinahanglan nga siya maoy mangunay.
Mao ni ang nakadaot kun mangaguba na ang relasyon sa politika. Pasko na! Ihikling intawon ninyo ang personal! Pwede ceasefire una?
* * *
Bisan may gag order si Regional Trial Court Judge Ester Veloso ngadto sa mga kampo sa prosecution panel ug sa defense team apan di gyud mapugngan nga manggawas gihapon ang mga istorya sa court proceedings sa pagtestigo sa 12-anyos nga batang babaye.
Samtang miingon si manalalaban Rameses Villagonzalo sa depensa nga pabor kanila ang testimonya sa bata apan ang akong kasaligang tinubdan nagkanayon nga pabor gyud sa prosecution.
Gani matud pa, gisapot ang mga abogado ni Bella Ruby Santos kay gisubli gyud sa 12-anyos nga batang testigo ang iyang deklarasyon nga si Bella maoy misignit kang Ellah Joy Pique.
Sigun sa tinubdan nga dili gyud mahug nga boluntaryo ang pagsakay ni Ellah Joy sa sakyanan kay gihuptan dayon ni Bella si Ellah Joy.
Akong nahibaw-an nga gi-andam na karon sa prosecution panel ang ilang ikaduhang testigo nga 8-anyos ug manghud sa unang mitestigo pagpalig-on sa ebidensya sa prosekusyon.
* * *
With all due respect ni Cebu Assistant Prosecutor Aida Sanchez nga sakop sa Cebu City Anti-Indecency Board (CCAIB) nakaila ko ni Cebu Assistant Provincial Prosecutor Ferdinand Collantes nga maoy nag-resolve sa ilang kiha batok sa duha ka mga lokal nga mga mantalaan.
Bisan taga-Leyte apan nakasabot kaayo sa pinulongang bisaya si piskal Collantes nga maoy nag-dismissed sa kaso batok sa taga Sun.star Superbalita ug sa Banat News sa The Freeman sa giingong binastos nga mga publications.
Ilang gipangayo ni piskal Sanchez nga mag-umol og investigating panel nga maoy moresolbar sa ilang motion for reconsideration. Hinuon ila man kini’ng katungod.
Pero magpasalamat ko kay wa himoang rason ni piskal Sanchez nga gigawngan si piskal Collantes sa iyang boss nga si Cebu Provincial Prosecutor Pepita Jane Petralba kinsa may lindog sa Banat News ug sa makausa nahitabo kaniadto ang ilang panagtrukis kun kinsay palingkuron kaniadto sa Naga City Prosecutor’s Office.
* * *
Salamat nga ang among team sa dySS Super Radyo/RGMA gi-imbitar pag-apil sa padayong torneyo sa duwang basketball diha sa Mabolo Community Basketball Association (MCBA).
Si Commissioner Edward Ligas sa MCBA ug maoy organizer maoy nangusog nga makasalmot kami sa ilang torneyo.
Apil nga giimbitar nga mga media outlet ug misalmot sab mao ang Cebu Daily News ug ang TV 5.
Samtang ang ubang team mao ang MCBA-A (Haojue), MCBA-B (Sunriser), MCBA-C ug MCBA-D. Nahug nga pito ka team kaming tanan.
Bintaha nga dunay ingon ani nga matang sa paugnat sa kusog aron piskay kanunay ang lawas ug madesiplina paglikay sa mga bisyo nga way hinungdan nga makadaot kaayo sa panglawas.
Nakatilaw mi og pildi niadtong Nobyembre 6 nga maoy opening sa taga MCBA-B (Sunriser) tungod sa kakuwang namo og tawo.
Apan kagahapon ga medyo ubay-ubay na kaming nakatunga sayon namong gipildi ang MCBA-C.
